ᐃᖅᑲᓇᐃᔮᕗᑦ

ᑐᓴᕋᓱᐊᕐᓃᑦ

ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᐱᓕᕆᐊᒃᓴᖏᑕ ᓇᓗᓇᐃᔭᖅᑕᐅᓯᒪᔾᔪᑎᖏᑦ, ᐊᒻᒪᓗᑦᑕᐅᖅ ᒪᓕᒋᐊᓖᑦ ᐊᐅᓚᑦᓯᔾᔪᑏᑦ ᐊᔪᓐᖏᑎᑕᐅᔾᔪᑕᐅᕗᑦ ᑲᒥᓯᓇ ᑐᓴᕋᓱᐊᕐᓂᖃᖃᑦᑕᕈᑎᒃᓴᖓᓄᑦ ᖃᖓᑐᐃᓐᓇᖅ ᐊᒻᒪᓗ ᓇᓂᑐᐃᓐᓇᖅ ᓄᓇᕗᒻᒥ ᓯᓚᑖᓂᓘᓐᓃᑦ ᓈᖕᒪᒐᓱᒋᔭᒥᒍᑦ. ᑐᓴᕋᓱᐊᕐᓃᑦ ᐃᓄᖕᓄᑦ ᐅᐸᑦᑕᐅᔪᓐᓇᖅᑐᒦᒋᐊᓖᑦ, ᑭᓯᐊᓂ ᓇᓗᓇᐃᖅᑕᐅᓯᒪᑉᐸᑦ ᖃᓄᐃᒍᒪᓂᕆᔭᐅᔪᒥᒃ ᐊᓱᐃᓛᒃ ᑲᒥᓯᓇ ᐃᓱᒪᑦᓯᐊᒥᓂᒃ ᐃᖕᒥᒃᑰᖓᔪᓂᒃ ᓈᓚᓐᓂᖃᖅᑎᑦᓯᔪᓐᓇᖅᐳᖅ.

ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᒫᓐᓇ ᐱᐊᓂᒃᓯᒪᓕᖅᑐᑦ ᐃᓘᓐᓇᖏᓐᓂᒃ ᓄᓇᓕᖕᓂᒃ ᑐᓴᕋᓱᐊᕐᓂᖃᕐᕕᖃᖅᓯᒪᓪᓗᑎᒃ ᐊᒻᒪᓗ ᐃᖕᒥᒃᑰᖓᔪᓂᒃ ᑐᓴᕋᓱᐊᕐᓂᖃᖃᑦᑕᖅᓯᒪᓪᓗᑎᒃ. ᑭᖑᓪᓕᖅᐹᖑᓚᐅᖅᑐᑦ ᑐᓴᕋᓱᐊᕐᓂᐅᔪᑦ ᒥᑦᑎᒪᑕᓕᒃ, ᐋᑐᕚ ᐊᒻᒪᓗ ᓴᓂᑭᓗᐊᖅ. ᑭᒡᓕᓯᓂᐊᖅᑏᑦ 16-ᖏᖅᑕᖅᓱᑎᒃ ᓄᓇᓕᖕᓂᒃ ᑐᓴᕋᓱᐊᕐᓂᖃᖃᑦᑕᓚᐅᖅᑐᑦ, ᐃᓚᒋᔭᐅᓪᓗᑎᒃ ᒪᕐᕉᒃ ᓄᓇᓖᑦ ᐅᐸᑦᑕᐅᑲᓐᓂᕐᓂᖏᒃ: ᑭᒻᒥᕈᑦ ᐊᒻᒪᓗ ᓴᓂᑭᓗᐊᖅ. ᑭᒻᒥᕈᑦ ᓯᕗᓪᓕᖅᐸᐅᓚᐅᕐᒪᑦ ᓄᓇᓕᓐᓂ ᑭᒡᓕᓯᓂᐊᖅᑎᓄᑦ ᑐᓴᕆᐊᕐᕕᐅᓪᓗᓂ ᐊᒻᒪᓗ ᖃᐅᔨᔾᔪᑎᒻᒪᕆᐅᓚᐅᕐᒪᑦ ᑲᒥᓴᒃᑯᑦ ᐃᓕᑉᐹᓕᖅᑐᒻᒪᕆᐅᕕᒋᓪᓗᓂᐅᒃ ᐊᓯᖏᓐᓄᑦ ᐊᑐᖅᑐᒃᓴᓂᒃ ᑐᓴᕆᐊᕐᓂᕐᓄᑦ ᐊᒻᒪᓗ ᑭᒻᒥᕈᑦ ᐅᐸᑦᑕᐅᑲᓐᓂᓛᕐᓂᐊᕐᒪᕆᓚᐅᕐᒪᑦ. ᑭᒡᓕᓯᓂᐊᖅᑏᑦ ᓴᓂᑭᓗᐊᓕᐊᒃᑲᓐᓂᓚᐅᖅᑐᑦ ᒪᖃᐃᑎᒥᒃ ᔭᒐᓯᒪᔪᖃᓚᐅᕐᒪᑦ ᑕᐃᑲᓃᒋᐊᓐᖓᑎᓪᓗᒋᑦ ᑭᒡᓕᓯᓂᐊᖅᑏᑦ. ᑕᒪᓐᓇ ᐱᔾᔪᑕᐅᓪᓗᓂ, ᓄᓇᓕᒻᒥᐅᑦ ᐊᒻᒪᓗ ᐃᓚᒌᕋᓴᐅᔪᑦ ᐊᖏᕈᑎᒃᑰᖅᓯᒪᓗᑎᒃ ᐅᓂᒃᑳᕆᐊᖅᑐᕈᓐᓇᓚᐅᓐᖏᒻᒪᑕ. ᑲᒥᓯᓇ ᐃᒡᓗᓕᐅᖅᑎ ᐅᑎᓚᐅᕐᒥᔪᖅ ᐃᒡᓗᓕᒻᒧᑦ ᐊᐱᖅᓱᕆᐊᖅᑐᖅᓱᓂ ᐃᓄᖕᓂᒃ ᐊᒥᓱᒐᓚᓐᓂᒃ ᐅᓂᒃᑳᕈᓐᓇᓚᐅᓐᖏᑦᑐᓂᒃ ᐊᖏᕈᑎᒃᑰᖅᑕᐅᓯᒪᓗᑎᒃ ᑭᒡᓕᓯᓂᐊᖅᑏᑦ ᑐᓴᕋᓱᐊᕐᓂᖃᕆᐊᓐᖓᑎᓪᓗᒋᑦ ᑕᕝᕙᓂ.

ᖃᐅᔨᓴᕐᓂᖅ

ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᐱᓇᓱᐊᕋᑦᓴᕆᖃᑕᐅᔭᖏᑦ ᖃᐅᔨᓇᓱᐊᕐᓂᖅ ᖃᓄᐃᓕᐅᕐᓂᕆᔭᐅᖃᑦᑕᖅᓯᒪᔪᓂᒃ ᕿᑭᖅᑖᓗᖕᒥᐅᑦ ᐃᓄᖏᓐᓂᒃ ᐊᒻᒪᓗ ᖃᓄᐃᓕᐅᕐᓂᕆᔭᐅᖃᑦᑕᖅᓯᒪᔪᑦ 1980 ᒥᑦᓯᑎᓐᓂ. ᖃᐅᔨᓇᓱᐊᕐᓂᐅᔪᓃᖃᑕᐅᓪᓗᑎᒃ ᑲᑎᖅᓱᖅᑕᐅᓂᖏᑦ ᐃᑦᑕᕐᓂᓴᐃᑦ ᑐᖅᑯᖅᑕᐅᓯᒪᔪᑦ ᑐᓴᐅᒪᔾᔪᑎᒃᓴᑦ ᐋᑐᕚᒦᑦᑐᑦ, ᑐᕌᓐᑐ ᐊᒻᒪᓗ ᔭᓗᓇᐃᕝᒥ, ᐊᒻᒪᓗᑦᑕᐅᖅ ᕿᒥᕐᕈᓇᑦᑕᐅᒋᐊᒃᑲᓂᕐᓂᖏᑦ ᐊᖏᕈᑎᒃᑰᖅᓯᒪᔪᑦ ᐅᓂᒃᑳᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᑐᓴᕋᓱᐊᕐᓂᕆᓯᒪᔭᖏᓐᓂ ᐊᒻᒪᓗ ᐊᓯᖏᑦ ᐅᓂᒃᑲᐅᓰᑦ ᖃᓄᐃᓕᐅᕐᓂᕆᔭᐅᖃᑦᑕᖅᓯᒪᔪᓂᒃ ᓄᐊᑕᐅᓯᒪᔪᑦ.

ᐊᖏᕈᑎᒃᑰᖅᓯᒪᔪᓄᑦ ᐅᓂᒃᑳᖑᓯᒪᔪᑦ ᐃᓄᖕᓂᒃ ᐊᒻᒪᓗ ᐃᓄᓐᓃᖔᖅᓯᒪᓐᖏᑦᑐᓂᒃ ᕿᑭᖅᑕᓂ ᓄᓇᖓᓂᒃ ᐊᒻᒪᓗ ᐋᑐᕚᒥ ᐱᖕᒪᕆᐅᒻᒥᔪᑦ ᐃᑲᔫᑎᖃᕈᓐᓇᕐᓂᖏᑦ ᑐᓴᕈᑎᓕᐊᖑᓯᒪᔪᑦ ᖃᓄᐃᓕᐅᕐᓂᕆᔭᐅᖃᑦᑕᖅᓯᒪᔪᓂᒃ ᕿᑭᖅᑖᓗᖕᒥ ᐊᒻᒪᓗ ᖃᓄᐃᓕᐅᕈᑕᐅᓯᒪᔪᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᖃᐅᔨᓴᕈᑎᒋᔭᖏᑦ.

ᖃᓄᐃᓕᐅᕐᓂᐅᖃᑦᑕᖅᓯᒪᔪᑦ

ᖃᓄᐃᓕᐅᕐᓂᕆᔭᐅᖃᑦᑕᖅᓯᒪᔪᑦ ᐊᑐᓂᑦ 13-ᓂ ᕿᑭᖅᑖᓗᖕᒥ ᓄᓇᓕᖏᓐᓂ ᑎᑎᕋᖅᑕᐅᓯᒪᔪᑦ. ᓄᓇᓕᓕᒫᑲᓴᑦ ᑎᑎᕋᖅᓯᒪᔪᖃᓚᐅᓐᖏᑦᑐᑦ ᖃᓄᐃᓕᐅᕐᓂᐅᖃᑦᑕᖅᓯᒪᔪᓂᒃ. ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᖃᓄᐃᓕᐅᕐᓂᐅᖃᑦᑕᖅᓯᒪᔪᖁᑎᖏᑦ ᐃᑦᑕᕐᓂᓴᖃᕐᕕᖏᓐᓂ ᑐᖅᑯᖅᑕᐅᓯᒪᔪᑦ ᑐᓴᕈᑏᑦ, ᐊᖏᕈᑎᒃᑰᖅᑕᐅᓯᒪᔪᓄᑦ ᐅᓂᒃᑲᖑᖃᑦᑕᖅᓯᒪᔪᑦ ᐊᒻᒪᓗ ᑎᑎᕋᖅᑕᐅᓯᒪᔪᓂᒃ ᐃᑲᔪᖅᑕᐅᕕᒃᓴᓂᒃ. ᓇᐃᓈᖅᓯᒪᔪᑦ ᑎᑎᕋᖅᓯᒪᓂᖏᑦ ᐃᓚᓕᐅᔾᔭᐅᓯᒪᔪᑦ ᑖᒃᑯᓇᓂ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᐃᑭᐊᖅᑭᕝᕕᖓᓂ. ᐊᑕᖏᖅᑎᓪᓗᒋᑦ ᑎᑎᕋᖅᑕᐅᓯᒪᔪᑦ ᑖᒃᑯᓄᖓ ᓇᑦᓯᐅᔾᔭᐅᓯᒪᓂᐊᖅᑐᑦ ᐃᓱᐊᓂ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᐅᓂᒃᑳᓕᐊᒻᒪᕆᒋᓯᒪᔭᖏᓐᓂ.

ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᖃᐅᔨᓴᖅᐸᓪᓕᐊᒻᒥᔪᑦ ᐊᒻᒪᓗ ᑎᑎᕋᖅᐸᓪᓕᐊᓪᓗᒋᑦ ᖃᓄᐃᓕᐅᕐᓂᐅᖃᑦᑕᖅᓯᒪᔪᑦ ᐅᖃᐅᓯᕆᔭᐅᓯᒪᔪᑦ ᓴᖅᑭᖅᑕᐅᓯᒪᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪᓗ ᑐᓴᕋᓱᐊᕐᓂᐅᖃᑦᑕᖅᓯᒪᔪᓃᓐᖔᖅᑐᑦ ᓇᓗᓇᐃᔭᖅᑕᐅᓯᒪᓪᓗᑎᒃ ᖃᓄᐃᓐᓂᐅᖃᑦᑕᖅᓯᒪᔪᓂᒃ ᐊᑐᐃᓐᓇᐅᓂᐊᕐᒥᔪᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᐃᑭᐊᖅᑭᕝᕕᖓᓂ. ᐊᑕᖏᖅᑎᓪᓗᒋᑦ ᑎᑎᕋᖅᑕᐅᓯᒪᔪᑦ ᑖᒃᑯᓄᖓ ᓇᑦᓯᐅᔾᔭᐅᓯᒪᓂᐊᖅᑐᑦ ᐃᓱᐊᓂ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᐅᓂᒃᑳᓕᐊᒻᒪᕆᒋᓯᒪᔭᖏᓐᓂ.

ᐅᑯᓄᓐᖓᖓᔪᑦ ᐅᖃᐅᓯᕆᔭᐅᓯᒪᓂᐊᖅᑐᑦ ᓇᓗᓇᐃᖅᑐᐃᕕᒋᔭᐅᔪᓂ ᐃᑦᑕᕐᓂᓴᕐᓂ:

• ᐃᒥᐊᓗᒃ

• ᐱᕙᓪᓕᐊᓂᖓ

• ᐃᓕᓐᓂᐊᕐᓂᓕᕆᓂᖅ

• ᐊᐅᓚᑦᑎᔨᐅᑎᑕᐅᔪᑦ ᑲᒪᒋᔭᔅᓴᖏᑦ

• ᐋᓐᓂᐊᖅᑐᓕᕆᓂᖅ

• ᐃᓪᓗᓕᕆᓂᖅ

• ᐊᖑᓇᓱᖃᑦᑕᕐᓂᖅ

• ᐃᓕᖅᑯᓯᖃᖃᑎᒌᙱᑦᑐᑦ ᑐᓴᐅᒪᖃᑎᒌᖃᑦᑕᕐᓂᖏᑦ

• ᒐᕙᒪᒃᑯᑦ

• ᐸᓖᓯᒃᑯᑦ

• ᐊᐅᓪᓛᖅᑎᑕᐅᓚᐅᕐᓯᒪᔪᑦ

• ᓄᓇᓕᓐᓂᑦ ᐃᓅᓯᖅ

• ᕿᒻᒦᑦ ᐊᐅᓪᓚᑏᑦ

ᖃᕆᓴᐅᔭᒧᑦ ᑐᖅᑯᖅᑐᐃᕕᒃ ᖃᐅᔨᓴᕈᑎᕕᓂᕐᓂᒃ

ᑭᒡᓕᓯᓂᐊᖅᑏᑦ ᐋᖅᑭᑦᓱᐃᓂᐊᕐᒥᔪᖅ ᖃᕆᓴᐅᔭᒃᑯᑦ ᑲᑎᖅᓱᐃᕕᖕᒥᒃ ᖃᐅᔨᓴᕈᑎᒥᓂᕐᓂᒃ ᓇᓗᓇᐃᖅᑐᖅᑕᐅᓯᒪᕕᖕᒥᒃ ᐃᑦᑕᕐᓂᓴᑦ ᐊᒻᒪᓗ ᐅᓂᒃᑳᑦ ᐃᑦᑕᕐᓂᓴᑦ ᑐᓴᕈᑏᑦ ᒫᓐᓇ ᑲᑎᖅᓱᖅᑕᐅᕙᓪᓕᐊᔪᑦ. ᑐᓴᕈᑏ ᐊᑐᐃᓐᓇᕈᖅᑕᐅᓂᐊᖅᑐᑦ ᖃᕆᓴᐅᔭᒃᑯᑦ ᑲᑎᖅᓱᐃᕕᖕᒥ ᖃᐅᔨᓴᕈᑎᒥᓂᕐᓂᒃ ᐃᓚᒋᔭᐅᓪᓗᑎᒃ ᓇᕿᑦᑕᖅᑕᐅᓯᒪᔪᑦ ᐅᓂᒃᑳᓪᓚᑦᑖᖑᓯᒪᔪᑦ ᐊᒻᒪᓗ ᐃᓄᒃᑎᑑᓕᖅᑕᐅᓯᒪᔪᑦ/ ᖃᓪᓗᓈᑎᑑᓕᖅᑕᐅᓯᒪᔪᑦ, ᐊᒻᒪᓗ ᓂᐱᓕᐅᒐᑦ ᐊᒻᒪᓗ ᑕᕐᕆᔭᐃᑦ. ᐱᐊᓂᒃᑕᐅᑉᐸᑕ, ᖃᕆᓴᐅᔭᒃᑯᑦ ᑲᑎᖅᓱᐃᕕᒃ ᖃᐅᔨᓴᕈᑎᕕᓂᕐᓂᒃ ᑕᑯᒋᐊᕋᑦᓴᐅᓕᕐᓗᓂ ᕿᑭᖅᑕᓂᒃᑯᑎᒍᑦ ᐋᖅᑭᑦᑕᐅᓇᓱᐊᕐᓂᖓᓂ ᐊᓯᐊᒍᑦ ᐊᑐᐃᓐᓇᐅᕕᒋᓂᐊᖅᑕᖓᒍᑦ ᓴᖅᑭᖅᑎᑕᐅᓯᒪᕕᒋᓂᐊᖅᑕᖓᒍᓪᓗ.

ᑭᖑᓪᓕᖅᐹᖅᓯᐅᑦ ᐅᓂᒃᑳᖅ ᐊᒻᒪᓗ ᐊᑐᓕᖁᔨᔾᔪᑎᓕᐊᖑᔪᑦ

ᑲᒥᓯᓇ ᑐᓂᓯᓂᐊᖅᑐᖅ ᑭᖑᓪᓕᖅᐹᖅᓯᐅᒻᒥᒃ ᑎᑎᕋᖅᓯᒪᔪᓂᒃ ᐅᓂᒃᑳᒥᒃ ᐅᕝᕙᓘᓐᓃᑦ ᐅᓂᒃᑳᓂᒃ ᐅᐱᕐᖔᕐᒥ 2010 ᑭᖑᓂᐊᓂᐅᓐᖏᑦᑐᖅ. ᐅᓂᒃᑳᖅ ᓴᖅᑭᖅᑕᐅᓂᐊᖅᑐᖅ ᐊᑕᐅᓯᒃᑯᑦ ᓴᖅᑭᖅᑕᐅᓗᑎᒃ ᐃᓄᒃᑎᑑᖅᑐᑦ ᐊᒻᒪᓗ ᖃᓪᓗᓈᑎᑑᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑲᑎᒪᔨᖏᓐᓄᑦ ᐊᒻᒪᓗ ᑭᖑᓂᐊᒍᑦ ᐃᓄᖕᓄᑦ ᓴᖅᑭᖅᑕᐅᓕᕐᓗᓂ. ᐊᑐᖁᔨᔾᔪᑕᐅᔪᑦ ᐊᑐᖅᑎᑦᑎᒋᐊᕐᓂᕐᒧᑦ ᓴᐃᒻᒪᖃᑎᒌᓐᓂᕐᒥᒃ ᐱᖃᓯᐅᔾᔭᐅᓂᐊᖅᑐᑦ ᐅᓂᒃᑳᓂᒃ. ᐊᑐᐃᓐᓇᐅᓕᑐᐊᖅᑲᑕ, ᐊᑐᖁᔨᔾᔪᑕᐅᔪᑦ ᑎᑎᕋᖅᑕᐅᓯᒪᓛᖅᑐᑦ ᑕᒫᓂ ᒪᑉᐱᒐᕐᒥ

ᑐᓴᕋᓱᐊᕐᓂᐅᖃᑦᑕᓂᐊᖅᑐᑦ

ᐅᓂᒃᑳᓃᑦᑐᑦ ᐊᑐᓕᖁᔨᔾᔪᑎᓕᐊᖑᔪᑦ ᐋᔩᕋᕈᑕᐅᔪᒫᕐᓂᐊᖅᑐᖅ ᓯᕗᓂᐊᒍᑦ ᑲᑐᔾᔨᖃᑎᒌᓄᑦ ᓲᕐᓗ ᐸᓖᓯᒃᑯᓐᓄᑦ ᖃᐅᔨᔪᒪᓇᔭᖅᑐᓄᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᒃᑯᑦ ᓴᖅᑭᖅᑎᑕᖏᓐᓂᒃ ᐊᒻᒪᓗ ᑕᐃᒃᑯᐊ ᓇᖕᒥᓂᖅ ᐊᐅᓚᓂᕆᔭᒥᒍᑦ ᓴᖅᑭᑎᑦᓯᓯᒪᔪᑦ ᐃᓱᒪᒋᔭᐅᒋᐊᕐᓂᐊᕐᒥᔪᑦ ᐊᑐᓕᖁᔨᔾᔪᑎᓕᐊᖑᔪᓂ.