ᐊᐱᖅᑯᑎᒋᔭᐅᒐᔪᑦᑐᑦ

ᑭᒃᑰᒻᒪᑕ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ?

ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ (ᑭᒡᓕᓯᓂᐊᖅᑏᑦ) ᓴᖅᑭᖅᑕᐅᓚᐅᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ (ᕿᑭᖅᑕᓂᒃᑯᑦ) ᐆᑦᑑᕝᕙ 2007-ᒥ. ᕿᑭᖅᑕᓂᒃᑯᑦ ᐊᐅᓚᑦᓯᔨᐅᔪᑦ ᓄᓇᒥᒃ ᐊᒻᒪᓗ ᐊᓯᖏᓐᓂᒃ ᐱᔪᒪᔭᐅᔪᓂᒃ ᐃᓄᖏᓐᓄᑦ ᕿᑭᖅᑕᓂᒥᐅᑕᕐᓄᑦ, ᖁᑦᓯᑦᑐᒥᐅᑕᕐᓄᑦ ᐊᒻᒪᓗ ᓴᓂᑭᓗᐊᑉ ᕿᑭᖅᑕᖏᓐᓂᒥᐅᑕᕐᓄᑦ. ᓴᖅᑭᖅᑕᐅᓚᐅᖅᑐᑦ ᑭᒡᓕᓯᓂᐊᖅᑏᑦ ᖃᐅᔨᓴᖅᑕᐅᖁᓪᓗᒍ ᐱᓪᓚᑦᑖᖅᑐᒥᓃᑦ, ᐊᐱᖅᓱᖃᑦᑕᕐᓂᖅ ᑕᑯᓐᓇᖅᑐᒥᓂᕐᓂᒃ, ᑐᓴᕋᓱᐊᓂᖃᖃᑦᑕᓂᒃᑯᑦ ᐊᒻᒪᓗ ᐅᓂᒃᑳᓕᐅᕐᓗᑎᒃ ᕿᑭᖅᑕᓂᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᐃᓄᖕᓄᑦ, ᓱᓕᓂᖓᓂᒃ ᖃᐅᔨᑎᑦᓯᓇᓱᐊᕐᓗᑎᒃ “ᕿᒻᒦᔭᖅᑕᐅᓂᐅᓂᕋᖅᑕᐅᓯᒪᔪᒥᒃ”, “ᓄᒃᑎᖅᑕᐅᖃᑦᑕᖅᓯᒪᔪᓂᒃ” ᐊᒻᒪᓗ ᐊᓯᖏᓐᓂᒃ ᐋᖅᑭᑦᓱᐃᖃᑦᑕᖅᓯᒪᓂᖏᓐᓂᒃ ᑐᑭᑖᕈᑕᐅᔭᕆᐊᓕᓐᓂᒃ ᒐᕙᒪᒃᑯᑦ 1980-ᒧᓄᑦ, ᐊᒻᒪᓗ ᐃᓱᒪᒃᓴᖅᓯᐅᕈᑕᐅᓗᑎᒃ ᐊᒃᑐᐃᓯᒪᓂᕆᔭᐅᔪᑦ ᐋᖅᑭᑦᑕᐅᖃᑦᑕᖅᓯᒪᔪᓄᑦ ᑐᑭᑖᕈᑕᐅᔭᕆᐊᓕᓐᓄᑦ ᐃᓄᐃᑦ ᐃᓕᖅᑯᓯᖓᓄᑦ, ᒪᑭᒪᔾᔪᑎᖏᓐᓄᑦ ᐊᒻᒪᓗ ᐃᓅᓇᓱᐊᕈᓯᖏᓐᓄᑦ.

ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ (ᑭᒡᓕᓯᓂᐊᖅᑏᑦ) ᖃᐅᔨᓴᕐᓂᖃᔾᔮᖏᑦᑐᑦ ᑖᒃᑯᓄᓐᖓᖓᔪᓂᒃ “ᖁᑦᓯᑦᑐᒧᑦ ᓅᑕᐅᓚᐅᖅᑐᒥᓂᕐᓂᒃ” ᐊᒻᒪᓗ ‘ᐃᓕᓐᓂᐊᕆᐊᖅᑎᑕᐅᖃᑦᑕᖅᓯᒪᔪᓂᒃ ᐊᖏᕐᕋᒥᓂᒃ ᓅᑕᐅᓪᓗᑎᒃ’ ᐅᕝᕙᓘᓐᓃᑦ ᐊᓯᖏᓐᓅᖓᔪᓂᒃ ᐱᓕᕆᐊᖑᐊᓂᑦᑐᓂᒃ, ᐃᓚᒋᔭᐅᓪᓗᓂ ᐃᖅᑲᖅᑐᐃᕕᒃᑰᑎᑦᓯᓂᖅ ᐅᕝᕙᓘᓐᓃᑦ ᑐᑭᑖᕈᔾᔨᔨᖃᖅᑎᑦᓯᓂᒃᑯᑦ.

ᐸᓖᓯᒃᑯᑦ ᐃᓚᐅᑎᑕᐅᕙᑦ ᑭᒡᓕᓯᓂᐊᖅᑎᓄᑦ?

ᐸᓖᓯᒃᑯᑦ ᐃᑲᔪᖅᓯᒪᔪᑦ ᐱᓕᕆᕝᕕᒋᔭᒥᒍᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᓂᒃ, ᐃᑲᔫᑎᒋᔭᐅᓪᓗᓂ ᐊᑐᐃᓐᓇᐅᒪᑦᓯᓂᖏᑦ ᑐᖅᑯᖅᑐᖅᓯᒪᔭᖏᓐᓂᒃ ᐃᑦᑕᕐᓂᓴᕐᓂᒃ ᐊᒻᒪᓗ ᐊᒥᓱᐅᕆᒍᓐᓇᑎᑦᓯᓂᕐᒥᒃ ᐱᓯᒪᔭᒥᓂᒃ ᑖᒃᑯᓄᓐᖓᖓᔪᓂᒃ ᐱᓇᓱᐊᕈᑎᒋᔭᖏᓐᓄᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ. ᐸᓖᓯᒃᑯᑦ ᐃᑲᔪᕈᑎᖃᕐᒥᔪᑦ ᓄᖅᑲᖓᓕᖅᑐᓂᒃ ᐃᖅᑲᓇᐃᔭᖅᑎᒥᓂᕐᓂᒃ ᐸᓖᓯᒃᑯᓐᓂᒃ ᑐᓴᕋᓱᐊᕐᓂᕐᒨᖓᔪᓂᒃ ᐊᐱᖅᓱᖅᑕᐅᖃᑦᑕᐅᔪᒪᔪᓂᒃ.

ᐸᓖᓯᒃᑯᑦ ᖃᐅᔨᓴᕐᓂᖃᕋᑖᓚᐅᖅᑐᑦ ᑖᒃᑯᓄᓐᖓᖓᔪᓂᒃ ᑐᖁᕋᖅᑕᐅᖃᑦᑕᖅᓯᒪᓂᕋᖅᑕᐅᔪᓄᑦ ᐃᓄᐃᑦ ᐊᐅᓪᓚᑎᖏᓐᓂᒃ ᐅᑭᐅᖏᑕ ᐊᑯᓐᓂᖏᓐᓂ 1950 ᐊᒻᒪᓗ 1970 2005-2006-ᒥ. ᑐᑭᓯᒋᐊᒃᑲᓐᓂᕐᕕᒃᓴᐅᔪᑦ ᐸᓖᓯᒃᑯᑦ ᐅᓂᒃᑳᖏᑦ, ᐅᓇ ᑕᑯᒋᐊᕐᓗᒍ http://www.rcmp.gc.ca//ccaps/sled_dogs_final_e.htm.

ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᐱᓕᕆᐊᕆᔭᖏᑦ ᐊᒃᑐᐊᓂᖃᖅᑲᑦ ᑲᓇᑕᐅᑉ ᒐᕙᒪᒃᑯᖏᑕ ᓱᓕᔪᒥᒃ ᐊᒻᒪᓗ ᓴᐃᒻᒪᖃᑎᒌᖕᓂᕐᒧᑦ ᑭᒡᓕᓯᓂᐊᖅᑎᓄᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᔪᒥᓂᕐᓄᑦ?

ᐋᒡᒐ, ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᐊᒃᑐᐊᓂᖃᓐᖏᑦᑐᑦ ᓱᓕᔪᒥᒃ ᐊᒻᒪᓗ ᓴᐃᒻᒪᖃᑎᒌᖕᓂᕐᒧᑦ ᑭᒡᓕᓯᓂᐊᖅᑏᑦ ᐱᓕᕆᐊᖏᓐᓄᑦ. ᑖᒃᑯᐊ ᓱᓕᔪᒥᒃ ᐊᒻᒪᓗ ᓴᐃᒻᒪᖃᑎᒌᖕᓂᕐᒧᑦ ᑭᒡᓕᓯᓂᐊᖅᑏᑦ ᒐᕙᒪᒃᑯᓃᓐᖔᖅᑐᑦ ᐱᓕᕆᐊᖃᖅᑐᑦ ᒪᓂᒪᑎᑦᓯᓂᕐᒥᒃ ᐊᒃᑐᖅᑕᐅᓯᒪᔪᓂᒃ ᓴᖅᑭᖅᑕᐅᓯᒪᔪᓂᒃ ᐊᓪᓚᐃᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᓯᒪᔪᒥᓃᑦ ᐊᖏᕐᕋᒥᓂᒃ ᓅᑕᐅᓪᓗᑎᒃ ᑲᒪᒋᔭᐅᔾᔪᑎᒃᓴᖏᓐᓂᒃ ᐅᓂᒃᑳᖁᓪᓗᒋᑦ ᓇᖕᒥᓂᖅ ᐊᑐᖅᓯᒪᔭᒥᓂᒃ ᐊᑦᑕᓇᓐᖏᑦᑐᒥᒃ ᐃᓕᖅᑯᓯᕐᒥᓅᖓᑎᓪᓗᒋᑦ ᓈᖕᒪᑦᑎᑕᐅᒋᐊᖅᓯᒪᔪᒃᑯᑦ ᑲᑎᓐᖓᓂᒃᑯᑦ. ᑐᑭᓯᒋᐊᒃᑲᓐᓂᕐᕕᒃᓴᐅᔪᖅ ᓱᓕᔪᒥᒃ ᐊᒻᒪᓗ ᓴᐃᒻᒪᖃᑎᒌᖕᓂᕐᒧᑦ ᑭᒡᓕᓯᓂᐊᖅᑏᑦ, ᑕᑯᒋᐊᕐᓗᒍ ᐅᕗᖓ http://www.trc-cvr.ca/indexen.html.

ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ ᐃᖅᑲᓇᐃᔭᖃᑎᖃᓐᖏᒃᑲᓗᐊᖅᑎᓪᓗᒋᑦ ᓱᓕᔪᒥᒃ ᐊᒻᒪᓗ ᓴᐃᒻᒪᖃᑎᒌᓐᓂᕐᒧᑦ ᑭᒡᓕᓯᓂᐊᖅᑎᓂᒃ, ᑭᒡᓕᓯᓂᐊᖅᑏᑦ ᖃᐅᔨᓇᓱᐊᖅᑐᑦ ᑐᑭᓯᒃᑲᓐᓂᕈᑎᒃᓴᐅᓇᔭᖅᑐᓂᒃ ᐃᓄᐃᑦ ᐃᓕᓐᓂᐊᕐᓂᕆᖃᑦᑕᖅᓯᒪᔭᖏᓐᓂᒃ ᐊᒻᒪᓗ ᐊᑐᖅᓯᒪᔭᖏᓐᓂᒃ ᓇᐅᒃᑯᑐᐃᓐᓇᖅ ᐃᓕᓐᓂᐊᕕᖕᒨᖓᔪᓂᒃ ᐊᑯᓐᓂᖏᓐᓂ 1950 ᐊᒻᒪᓗ 1980.

ᑭᓱᒥᒃ ᑐᕌᒐᑦᓴᓪᓗᐊᑕᖃᖅᑲᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ?

ᑐᕋᒐᑦᓴᓪᓗᐊᑕᕆᔭᖓ ᑭᒡᓕᓯᓂᐊᖅᑏᑦ ᑕᒻᒪᖅᑕᖅᓯᒪᓐᖏᑦᑐᒥᒃ ᐱᓪᓚᑦᑖᖅᓯᒪᔪᒥᒃ ᖃᓄᐃᓕᐅᖅᓯᒪᓂᕆᔭᐅᔪᑦ ᐅᖃᐅᓯᐅᖃᑦᑕᖅᓯᒪᔪᓂ ᖁᓛᓂ ᑎᑎᕋᖅᓯᒪᔪᑦ. ᐊᕙᖕᒧᐊᖓᓂᖅᓴᐅᔪᖅ ᓱᓕᔪᒥᒃ ᐊᒻᒪᓗ ᓴᐃᒻᒪᖃᑎᒌᖕᓂᕐᒧᑦ ᐊᐅᓚᑦᓯᔾᔪᑕᐅᔪᖅ ᖃᐅᔨᓇᓱᐊᕈᑕᐅᓪᓗᓂ ᒪᒥᓴᖅᐸᓪᓕᐊᔾᔪᑎᒃᓴᐅᓇᔭᖅᑐᓂᒃ ᑕᐃᒃᑯᓄᖓ ᓯᕐᓕᕿᑎᑕᐅᓯᒪᔪᓄᑦ ᐱᕋᔭᑕᐅᓯᒪᓂᒃᑯᑦ, ᐊᒻᒪᓗ ᒪᒥᓴᖅᐸᓪᓕᐊᒍᑎᖃᕈᓐᓇᖁᓪᓗᒋᑦ ᐃᓄᐃᑦ ᐊᒻᒪᓗ ᒐᕙᒪᒃᑯᑦ ᓴᐃᒻᒪᖃᑎᒌᑉᐸᓪᓕᐊᓗᑎᒃ ᐱᕝᕕᖃᖅᑎᑕᐅᓂᖏᓐᓄᑦ ᓴᖅᑭᖅᑕᐅᔾᔪᑎᒃᓴᖏᓐᓄᑦ ᑖᒃᑯᓄᓐᖓᖓᔪᑦ ᐱᓪᓚᑦᑖᖅᓯᒪᔪᑦ ᐊᒻᒪᓗ ᐱᕝᕕᖃᖅᑎᑕᐅᓂᕐᒧᑦ ᖃᐅᔨᕐᕚᓪᓚᑦᑕᐅᒍᑎᒃᓴᖏᓐᓂᒃ ᐊᒻᒪᓗ ᐃᓱᒪᒋᔪᓐᓇᐃᖃᑎᒌᓐᓂᕐᒧᑦ ᑎᑭᐅᑎᔪᓐᓇᕈᑎᒃᓴᖏᓐᓂᒃ. ᖃᐅᔨᔭᐅᓯᒪᔪᑦ ᐊᒻᒪᓗ ᐊᑐᓕᖁᔨᔾᔪᑎᓕᐊᖑᓯᒪᒧᑦ ᓴᖅᑭᖅᓯᒪᓪᓗᑎᒃ ᑕᕝᕙᓐᖓᑦ ᐊᐅᓚᓂᕆᔭᐅᔪᒥᒃ ᓴᖅᑭᖅᑕᐅᔪᒫᖅᑐᑦ ᑭᖑᓪᓕᖅᐹᖅᓯᐅᒻᒥ ᐅᓂᒃᑳᒥ.

ᓇᓕᖏᑦ ᓄᓇᓖᑦ ᐃᓚᐅᑎᑕᐅᓯᒪᕙᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᓄᑦ?

ᑖᒃᑯᐊ ᓄᓇᓖᑦ ᐃᓚᐅᑎᑕᐅᓯᒪᔪᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᓄᑦ:

ᑭᓇᒃᑯᑦ ᓯᕗᓕᖅᑎᑕᐅᒻᒪᑕ ᖃᐅᔨᔭᐅᓇᓱᐊᖅᑐᒥᒃ?

ᖃᐅᔨᔭᐅᓇᓱᐊᕐᓂᖓ ᓯᕗᓕᖅᑕᐅᔪᖅ ᑲᒥᓯᓇ ᔭᐃᒥᓯ ᐃᒡᓗᓕᐅᖅᑎᒧᑦ, ᐊᔪᓐᖏᑎᑕᐅᔪᖅ ᐊᐅᓚᓂᕆᔭᐅᓂᐊᖅᑐᓂᒃ ᐊᑐᖅᑎᑦᓯᓂᕐᒥᒃ ᐊᒻᒪᓗ ᐋᖅᑭᐅᒪᓂᕆᓂᐊᖅᑕᖏᓐᓂᒃ ᐃᓱᒪᒋᔭᒥᒍᑦ ᓈᖕᒪᒐᓱᒋᔭᒥᓂᒃ ᐋᖅᑭᓯᐊᖅᓯᒪᔪᒃᑯᑦ ᐊᐅᓚᓂᕆᓂᐊᖅᑕᖏᓐᓂᒃ ᑭᒡᓕᓯᓂᐊᖅᑏᑦ. ᑭᒡᓕᓯᓂᐊᖅᑏᑦ ᐃᖅᑲᓇᐃᔮᖓ ᐋᖅᑭᐅᒪᑎᑕᐅᓪᓗᓂ ᐊᐅᓚᑕᐅᔪᖅ ᒫᑦᓕᓐ ᕆᑦᕗᓐᒧᑦ, ᐊᐅᓚᑦᓯᔨᒻᒪᕆᒃ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᓂ.

ᖃᖓᒃᑯᓪᓕ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᒃ ᐅᓂᒃᑳᓕᐅᕈᒫᕐᒪᑕ?

ᑲᒥᓯᓇ ᓴᖅᑭᑎᑦᓯᓂᐊᖅᑐᖅ ᑭᖑᓪᓕᖅᐹᖅᓯᐅᒻᒥᒃ ᑎᑎᕋᖅᓯᒪᔪᓂᒃ ᐅᓂᒃᑳᒥᒃ ᐅᓂᒃᑳᓂᓪᓘᓐᓃᑦ ᒫᑦᓯ 31, 2010 ᑭᖑᓂᐊᓂᐅᓐᖏᑦᑐᖅ, ᐊᑕᐅᓯᒃᑯᑦ ᓴᖅᑭᖅᑕᐅᓗᑎᒃ ᐃᓄᒃᑎᑑᖅᑐᑦ ᐊᒻᒪᓗ ᖃᓪᓗᓈᑎᑑᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑲᑎᒪᔨᖏᓐᓄᑦ ᐊᒻᒪᓗ ᑭᖑᓂᐊᒍᑦ ᐃᓄᖕᓄᑦ ᓴᖅᑭᖅᑕᐅᓕᕐᓗᓂ.