ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ

ᐊᑐᐊᒐᐃᑦ ᐱᓕᕆᓂᖏᓐᓄᑦ

ᖃᐅᔨᓇᓱᓐᓂᖅ

1. ᑖᓐᓇ ᖃᐅᔨᓴᕐᓂᖅ ᑲᒪᒋᔭᐅᓂᐊᖅᑐᖅ ᒪᓕᓪᓗᒋᑦ ᐊᑐᐊᒐᖏᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᑕᐃᒫᒃ ᐊᖏᖅᑕᐅᓯᒪᒻᒪᑕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᕐᕌᒍᑕᒫᕐᓯᐅᒻᒥ ᑲᑎᒪᕕᔾᔪᐊᓂᕐᒥ ᐅᑐᐱᕆ, 2007-ᒥ.

2. ᐊᑐᐊᒐᖏᑦ ᐊᑐᕋᔭᖅᑐᑦ ᓈᒻᒪᖏᑦᑐᖃᓕᕐᓂᖅᑲᑦ ᐊᑲᐅᓐᖏᓕᕈᑎᑕᖃᕐᓂᖃᓪᓘᓐᓃᑦ ᑖᒃᑯᓇᓂ ᐊᑐᐊᒐᕐᓂᑦ ᐱᓕᕆᓂᖏᓐᓄᑦ ᐊᒻᒪᓗ ᐊᑐᐊᒐᖏᓐᓂᑦ ᖃᓄᐃᓕᐅᕆᐊᖃᕐᓂᖏᓐᓄᑦ ᓈᒻᒪᖏᑦᑐᖃᓕᖅᑲᑦ ᐊᑲᐅᓐᖏᓕᐅᕈᑎᖃᓕᖅᑲᓘᓐᓃᑦ.

ᐱᔾᔪᑎᖓᑦ

3. ᒪᓕᑦᑐᒋᑦ ᐊᑐᐊᒐᖏᑦ, ᐱᔾᔪᑎᖓᑦ ᑭᓪᓕᓯᓂᐊᖅᑏᑦ ᐃᒪᐃᑦᑑᕗᖅ:

   ᖃᐅᔨᓇᓱᐊᕐᓗᑎᒃ ᖃᐅᔨᓴᕐᓗᑎᒃ ᐊᑐᓪᓚᕆᔅᓯᒪᔪᓂᒃ, ᐊᐱᕐᓱᕐᓗᑎᒃ ᑕᑯᓐᓈᕐᓯᒪᔪᓂᒃ, ᐃᓄᓕᒫᖅᑎᑦᑎᓗᑎᒃ ᓈᓚᒋᐊᖅᑐᕐᓯᒪᖃᑦᑕᕐᓗᑎᒃ ᐊᒻᒪᓗ ᑐᓴᖅᑎᑦᑎᖃᑦᑕᕐᓗᑎᒃ ᑲᑎᒪᔨᓂᑦ ᕿᑭᖅᑕᓂᒃᑯᓐᓄᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ, ᓱᓕᔪᒥᒃ ᐱᔾᔪᑎᒋᓪᓗᒍ “ᕿᒻᒦᔭᐃᓂᐅᓚᐅᕐᓯᒪᔪᖅ”, “ᓅᑎᑦᑎᓂᐅᓚᐅᕐᓯᒪᔪᖅ” ᐊᒻᒪᓗ ᐊᓯᖏᓐᓂᑦ ᑐᑭᑖᕈᑕᐅᕙᑦᑐᒥᓃᑦ ᒐᕙᒪᒃᑯᓐᓂᑦ 1980-ᒧᑦ ᑎᑭᑦᑐᒍ, ᐊᒻᒪᓗ ᐊᑦᑐᐃᓯᒪᓂᖓᓂᒃ ᐃᓄᐃᑦ ᐃᓕᖅᑯᓯᖓᓐᓄᑦ, ᒪᑭᒪᓇᓱᐊᕈᑎᖓᓐᓄᑦ ᐃᓅᓯᖓᓐᓄᓪᓗ.

   ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ’ ᐱᔾᔪᑎᒋᓗᐊᕐᓂᐊᖅᑕᖓᑦ ᖃᐅᔨᒪᒋᐊᕐᓗᑎᒃ ᐱᑦᑎᐊᕐᓯᒪᔪᒥᒃ ᐊᑐᖅᑕᐅᓯᒪᔪᓂᒃ ᑭᖑᓂᑦᑎᓐᓂ ᖃᓄᐃᓕᐅᕈᑕᐅᓯᒪᔪᑦ ᖃᐅᔨᒪᔭᐅᔾᔪᑎᖃᖁᓪᓗᒋᑦ ᑖᒃᑯᐊ ᖁᓛᓂ ᑎᑎᕋᕐᓯᒪᔪᑦ ᐊᒻᒪᓗ ᒪᒥᓴᐃᖁᔨᓂᐊᖅᑐᑎᒃ. ᓱᓕᔪᒥᒃ ᐊᒻᒪᓗ ᐋᖅᑭᖃᑎᒌᓐᓂᕐᒥᒃ ᐱᓕᕆᓂᖅ ᐊᑐᖅᑎᑦᑎᒋᐊᕈᑕᐅᔪᒪᕗᖅ ᒪᒥᓴᐃᓂᕐᒥᒃ ᑕᐃᒃᑯᓄᖓ ᐊᔅᓱᕈᖅᑎᑕᐅᓚᐅᖅᑐᓄᑦ ᐊᒻᒪᓗᑦᑕᐅᖅ ᐋᖅᑭᖃᑎᒌᖁᓪᓗᒋᑦ ᑖᒃᑯᐊ ᐃᓄᐃᑦ ᒐᕙᒪᒃᑯᓪᓗ ᐱᕕᖃᖅᑎᑦᑎᓗᑎᒃ ᓴᖅᑮᓂᕐᒥᒃ ᐃᓘᓐᓇᓕᒫᑦᑎᐊᖏᓐᓂᒃ ᐊᑐᖅᑕᐅᓪᓚᑦᑖᕐᓯᒪᔪᓂᑦ ᐊᒻᒪᓗ ᐃᓕᓴᕆᔭᐅᓗᓂ ᑕᒪᓐᓇ ᐃᓱᒪᒋᔪᓐᓇᐃᕐᓯᓗᑎᓪᓗ.

ᑐᑭᖏᑦ

4. ᒪᓕᒐᕐᓂᑦ, ᐊᓯᐊᒍᓪᓕ ᑎᑎᕋᕐᓯᒪᓐᖏᑐᐊᖅᑲᑕ, ᑐᑭᓖᑦ ᐅᖃᐅᓰᑦ ᐃᒫᒃ:

   ᐃ) ᑭᓪᓕᓯᓂᐊᖅᑏᑦ: ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐋᖅᑭᑦᑕᐅᔪᔪᑦ ᐱᖁᔨᕗᖔᕈᑎᒃᑯᑦ B-06-127 ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ.

   ᐱ) ᑭᓪᓕᓯᓂᐊᖅᑎ: ᔭᐃᒥᓯ ᐃᒡᓗᓕᐅᕐᑎ, ᑎᒃᑯᐊᖅᑕᐅᔪᒧᖅ ᐱᖁᔨᕗᖔᕈᑎᒃᑯᑦ B-07-82 ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ.

   ᑎ) ᖃᐅᔨᒪᔨᑕᖅ: ᐹᓪ ᑯᕋᐅᓕ, ᑎᒃᑯᐊᖅᑕᐅᔪᔪᖅ ᐱᖁᔨᕗᖔᕈᑎᒃᑯᑦ B-07-82 ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐅᕝᕙᓘᓐᓃᑦ ᑭᓪᓕᓯᓂᐊᖅᑎᓂᒃ ᐃᑲᔪᕐᓂᐊᕐᖓᑦ ᑭᓪᓕᓯᓂᐊᖅᑎᓂᒃ ᖃᐅᔨᓴᕐᓂᕐᒥ.

   ᑭ) ᑭᓪᓕᓯᓂᐊᖅᑏᑦ ᐊᓪᓚᕝᕕᖏᑦ: ᐊᓪᓚᕝᕕᖃᕐᓂᐊᖅᑐᑦ ᑭᓪᓕᓯᓂᐊᖅᑏᑦ ᐃᖃᓗᓐᓂ, ᓄᓇᕗᒻᒥ.

   ᒋ) ᑭᓪᓕᓯᓂᐊᖅᑎᓄᑦ ᐃᖅᑲᓇᐃᔭᖅᑏᑦ: ᐃᖅᑲᓇᐃᔭᖅᑎᑖᔪᔪᑦ ᑭᓪᓕᓯᓂᐊᖅᑏᑦ.

   ᒥ) ᑎᑎᖅᑲᐃᑦ: ᑎᑎᕋᖅᑕᐅᓯᒪᔪᑦ ᑐᖅᑯᖅᑕᐅᓯᒪᔪᓪᓘᓐᓃᑦ ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᑎᑎᕋᖅᑕᐅᓯᒪᔪᑦ ᐊᒻᒪᓗ ᐱᖃᓯᐅᔾᔨᔪᑦ ᑎᑎᕋᕐᓯᒪᔪᓂᑦ, ᖃᕋᓴᐅᔭᒃᑯᑦ, ᓂᐱᓕᐅᖅᑕᐅᓯᒪᔪᑦ, ᑕᕐᕆᔮᔅᓴᓕᐅᖅᑕᐅᓯᒪᔪᑦ, ᓂᐱᓕᐅᖅᑕᐅᑲᓐᓂᕐᓯᒪᔪᑦ, ᐊᔾᔨᓕᐅᖅᑕᐅᓯᒪᔪᑦ, ᓄᓇᓐᖑᐊᑦ, ᑕᑯᔭᔅᓴᓕᐊᖑᓯᒪᔪᑦ, ᐊᔾᔩᑦ ᐊᑕᐅᑦᑎᒨᖅᑲᖅᑕᐅᓯᒪᔪᑦ ᐅᕝᕙᓘᓐᓃᑦ ᐊᓯᖏᓐᓂᑦ ᑎᑎᕋᕐᓯᒪᔪᑦ ᑐᑭᓯᐅᒪᔾᔪᑎᔅᓴᐃᓪᓗ ᑎᑎᕋᖅᑕᐅᓯᒪᔪᑦ ᐅᕝᕙᓘᓐᓃᑦ ᑲᑐᔾᔭᐅᔪᑦ ᑭᓱᑐᐃᓐᓇᖅᑎᒍᑦ ᐱᓕᕆᔾᔪᑎᑎᒍᑦ;

   ᓂ) ᖃᐅᔨᓇᓱᓐᓂᖅ: ᑭᓪᓕᓯᓂᐊᖅᑏᑦ.

   ᓯ) ᐱᖃᑕᐅᔪᖅ: ᑭᓇᑐᐃᓐᓇᑦᑎᐊᖅ ᐅᕝᕙᓘᓐᓃᑦ ᑲᑐᔾᔨᖃᑎᒌᑦ ᐱᔪᓐᓇᖅᑎᑕᐅᔪᖅ ᑭᓕᓯᓂᐊᖅᑎᒧᑦ ᐱᖃᑕᐅᖁᔭᐅᓗᓂ ᓈᓚᓐᓂᖏᓐᓂᒃ ᑭᓪᓕᓯᓂᐊᖅᑏᑦ;

   ᓕ) ᐃᓄᒃ: ᑭᓇᑐᐃᓐᓇᖅ ᐃᓄᑐᐃᓐᓇᖅ ᐊᒻᒪᓗ ᑲᑐᔾᔨᖃᑎᒌᖑᓐᖏᑦᑐᖅ ᑎᒥᖁᑕᐅᓐᖏᑐᕐᓘᓐᓃᑦ;

   ᔨ) ᑲᑐᔾᔨᖃᑎᒌᑦ: ᑲᑎᒪᔩᑦ, ᒐᕙᒪᒃᑯᑦ ᐱᓕᕆᕕᓪᓘᓐᓃᑦ ᐅᕝᕙᓘᓐᓃᑦ ᐊᓯᐊ ᑭᒡᒐᖅᑐᐃᓪᓗᑎᒃ ᑎᒥᐅᔪᑦ ᐃᓄᑐᐃᓐᓇᐅᖏᑦᑐᑦ.

   ᕕ) ᐊᑐᐊᒐᑦ: ᐊᖏᖅᑕᐅᓯᒪᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᖏᓐᓂᒃ ᐊᕐᕌᒍᑕᒫᕐᓯᐅᒻᒥ ᑲᑎᒪᕕᔾᔪᐊᕐᓂᖓᓐᓂ ᐱᖁᔨᕗᖔᕈᑎᒃᑯᑦ A-07-18.

ᐃᓘᓐᓇᖓᓂ

5. ᑭᓪᓕᓯᓂᐊᖅᑎ ᐋᖅᑭᒋᐊᕐᓯᖃᑦᑕᕈᓐᓇᖅᑐᖅ ᑖᒃᑯᓂᖓ ᐊᑐᐊᒐᕐᓂᑦ ᐅᕝᕙᓘᓐᓃᑦ ᑐᓂᓯᖃᑦᑕᕐᓗᓂ ᒪᓕᓪᓗᖏᑦ ᐱᔭᕆᐊᖃᕐᓂᖓ ᒪᓕᓪᓗᒍ ᖃᐅᔨᓇᓱᓐᓂᖅ ᓈᒪᑦᑎᐊᖁᓪᓗᒍ, ᓈᒻᒪᑦᑑᖁᓪᓗᒍ ᓈᒻᒪᓈᕐᓯᒪᑦᑎᐊᖁᓪᓗᒍᓗ.

6. ᐱᖃᑕᐅᔪᓕᒫᑦ ᑭᒡᒐᑐᖅᑎᒋᔭᖏᓪᓗ ᑖᒃᑯᓂᖓ ᒪᓕᒐᕐᓂᒃ ᒪᓕᖁᔭᐅᖃᑦᑕᓐᖑᓱᑦᑐᑦ, ᐊᒻᒪᓗ ᐅᖃᐅᓯᖃᕈᓐᓇᓐᖑᓱᑦᑐᑎᒃ ᖃᓄᑐᐃᓐᓇᑦᑎᐊᖅ ᐱᔾᔪᑕᐅᔪᓂᑦ ᒪᓕᑦᑎᐊᕈᑕᐅᓐᖏᑦᑐᓂᒃ ᑭᓪᓕᓯᓂᐊᖅᑎᒧᑦ.

7. ᑭᓪᓕᓯᓂᐊᖅᑎ ᑲᒪᒋᔭᖃᖃᑦᑕᓂᐊᖅᑐᖅ ᓱᕋᐃᔪᓂᒃ ᐊᑐᐊᒐᕐᓂᒃ ᑕᐃᒪᐃᒋᐊᖃᕐᓂᖓ ᒪᓕᓪᓗᒍ ᐱᖃᓯᐅᑎᓪᓗᒋᑦ, ᑭᓯᐊᓂ ᑕᕝᕗᖓᑐᐊᖅ ᑭᓪᓕᖃᕋᓂ, ᐲᕐᓯᓂᕐᒥᒃ ᐱᖃᑕᐅᔪᓐᓇᕐᓂᕐᒥᒃ, ᐊᒻᒪᓗ ᑭᓪᓕᓕᐅᕆᓗᓂ ᐱᖃᑕᐅᒃᑲᓂᕐᓂᐊᖅᑲᑕ ᐅᕝᕙᓘᓐᓃᑦ ᐅᐸᖃᑦᑕᓂᐊᖅᑲᑕ (ᐱᖃᑕᐅᑎᑦᑎᓐᖏᒍᓐᓇᖅᑐᓂᓗ) ᓈᓚᓐᓂᐅᔪᓂᑦ ᑭᓇᑐᐃᓐᓇᕐᒥᒃ ᐱᖃᑕᐅᔪᒥᒃ, ᑭᒡᒐᖅᑐᐃᔨᒥᒃ, ᐃᓄᑐᐃᓐᓇᕐᒥᒃ, ᑲᑐᔾᔨᖃᑎᒌᓂᑦ ᐅᕝᕙᓘᓐᓃᑦ ᐃᓚᒋᔭᐅᔪᓂᑦ ᑐᓴᕋᔅᓴᓕᕆᔨᓄᑦ.

8. ᒪᓕᑦᑐᑦ ᐊᑐᐊᒐᕐᓄᑦ, ᑲᒪᒋᔭᐅᓂᖏᑦ ᐊᐅᓚᔾᔪᓯᖏᓪᓗ ᒪᓕᑦᑕᐅᔭᕆᐊᓖᑦ ᖃᐅᔨᓇᓱᓐᓂᕐᒥ ᒪᓕᑦᑐᒍ ᐊᐅᓚᑦᑎᓂᖓ ᐱᖁᔨᓂᖓᓗ ᑭᓪᓕᓯᓂᐊᖅᑎᐅᑉ.

ᓈᓚᓐᓂᖅ

9. ᑭᓪᓕᓯᓂᐊᖅᑎ ᐋᖅᑮᓛᖅᑐᖅ ᐅᓪᓗᖏᓐᓂᒃ, ᐃᑲᕐᕋᖏᓐᓂᒃ ᓇᒥᓗ ᓈᓚᓐᓂᖃᖃᑦᑕᓛᕐᒪᖔᑕ.

10. ᐃᓱᒪᒋᔭᖃᕆᐊᖃᓪᓚᕆᖃᑦᑕᕐᓂᐊᑎᓪᓗᒋᑦ ᖃᐅᔨᒍᑎᖏᓐᓂᒃ ᖃᐅᔨᓴᕐᓂᖓᓐᓂ, ᑭᓪᓕᓯᓂᐊᖅᑏᑦ ᑲᑦᑐᖓᐃᕐᓯᒪᔪᑦ ᐃᓄᓕᒫᖅᑎᑦᑎᓂᒃᑯᑦ ᓈᓚᒋᐊᖃᑦᑕᓂᕐᒥᒃ.

11. ᓈᓚᓐᓂᓕᒫᑦ ᐃᓄᑦᑎᑑᖃᑦᑕᓛᖅᑐᑦ ᖃᓪᓗᓈᑎᑐᓪᓗ ᑐᓵᔨᖃᑦᑎᐊᕐᓗᑎᒃ ᐅᖃᖅᑕᐅᕙᓪᓕᐊᔪᓄᑦ, ᐊᔪᕐᓇᓐᖏᒐᐃᑉᐸᑦ.

12. ᑭᓯᐊᓂᓕ, ᑐᔅᓯᕋᐅᑎᓂᒃ ᑐᓂᓯᔪᖃᕈᓐᓇᖃᑦᑕᕋᔭᖅᑐᖅ ᐱᖃᑕᐅᔪᒥᑦ ᐊᐱᕆᓗᓂ ᑭᓪᓕᓯᓂᐊᖅᑎᒥᒃ ᐊᑐᖁᔨᓗᓂ ᓇᓪᓕᐊᓐᓂᑐᐃᓐᓇᖅ ᓈᓚᓐᓂᐅᔪᓂᑦ ᒪᑐᓯᒪᔪᒥ ᐊᐱᕐᓱᖅᑕᐅᔪᒪᓗᓂ. ᑐᔅᓯᕋᐅᑎᓕᐅᖅᑐᖃᖃᑦᑕᕈᓐᓇᖅᑐᖅ ᐱᓴᕋᐃᒍᓐᓇᖅᑲᑕᓗ ᐱᐅᓪᓗᓂ. ᖃᐅᔨᔾᔪᑏᑦ ᑐᓂᔭᐅᔪᓪᓗ ᑐᔅᓯᕋᐅᑏᑦ ᓴᖅᑭᖅᑕᐅᖃᑦᑕᕈᓐᓇᖅᑐᑦ ᑲᓐᖑᓇᖅᑐᒃᑯᑦ ᐅᕝᕙᓘᓐᓃᑦ ᑕᑯᔅᓴᒃᑯᑦ, ᑕᒪᒃᑮᓂᓪᓘᓐᓃᑦ, ᐱᖁᔨᓂᖓ ᑭᓪᓕᓯᓂᐊᖅᑎᐅᑉ ᒪᓕᓪᓗᒍ, ᒪᓕᑦᑐᒋᑦ ᑕᒃᑯᐊ ᐊᑐᐊᒐᐃᑦ, ᐊᑐᕐᓂᐊᖅᑐᑦ ᒪᑐᓯᒪᔪᒥ ᐋᖅᑭᒋᐊᖅᑕᐅᓯᒪᑦᑎᐊᕐᓗᑎᒃ.

13. ᑭᓪᓕᓯᓂᐊᖅᑎ, ᐱᔪᒪᓂᖓ ᒪᓕᓪᓗᒍ, ᓈᓚᓐᓂᖃᕈᓐᓇᖅᑐᖅ ᓇᓕᑐᐃᓐᓇᖏᓐᓂᒃ ᓈᓚᓐᓂᖏᓐᓂᒃ ᒪᑐᓯᒪᔪᒥ.

ᐱᖃᑕᐅᓂᖅ ᓈᓚᓐᓂᕐᓂᑦ

14. ᑭᓪᓕᓯᓂᐊᖅᑎ ᐃᓱᒪᕐᓱᑦᑎᐊᖃᑦᑕᓐᖑᓱᑦᑐᖅ ᐱᖃᑕᐅᓂᐊᕐᓂᖏᓐᓂᒃ ᐃᓄᑐᐃᓐᓇᐃᑦ ᑲᑐᔾᔨᖃᑎᒌᓪᓘᓐᓃᑦ ᓈᓚᓐᓂᖏᓐᓂᒃ ᑭᓪᓕᓯᓂᐊᖅᑏᑦ. ᑭᓪᓕᓯᓂᐊᖅᑎ ᐃᓘᓐᓇᖓᓂᒃ ᐃᓚᐃᓐᓇᖓᓂᓪᓘᓐᓃᑦ ᐱᖃᑕᐅᔪᓐᓇᑎᑦᑎᒍᓐᓇᖅᑐᖅ ᐃᓄᓕᒫᖅᑎᑎᓪᓗᑎᒃ ᓈᓚᓐᓂᐅᔪᓂᑦ ᐅᕝᕙᓘᓐᓃᑦ ᑲᓐᖑᓇᖅᑐᒥᒃ ᓈᓚᓐᓂᕐᒥᒃ.

15. ᐋᖅᑮᓂᖅ ᓯᕗᓪᓕᐅᑎᒋᐊᓕᓐᓂᑦ ᐱᖃᑕᐅᓂᐊᖅᑐᓄᑦ, ᑭᓪᓕᓯᓂᐊᖅᑏᑦ ᐃᓱᒪᒋᔭᖃᕆᐊᖃᑦᑕᓂᐊᖅᑐᑦ, ᑭᓯᐊᓂ ᑭᓪᓕᖃᓐᖏᑦᑐᖅ ᑖᔅᓱᒧᖓᑐᐊᖅ, ᐅᑯᓂᖓ ᐃᓱᒪᒋᔭᐅᒋᐊᖃᑦᑕᓂᐊᖅᑐᓂᒃ:

    ᐃ) ᐃᓄᒃ ᐊᑦᑐᖅᑕᐅᓯᒪᓪᓚᕆᑉᐸᑦ ᐃᓚᐃᓐᓇᖓᓂᓪᓗ ᐱᔾᔪᑕᐅᔪᓂᒃ ᑭᓪᓕᓯᓂᐊᖅᑏᑦ ᐱᔾᔪᑎᖓᓐᓂᒃ;

    ᐱ) ᑕᒪᑐᒪ ᒥᔅᓵᓄᑦ ᐅᓂᒃᑳᕈᑕᐅᓂᐊᖅᑐᑦ;

    ᑎ) ᑭᓪᓕᓯᓂᐊᖅᑎ ᖃᓄᐃᔅᓴᖏᑉᐸᑦ ᐃᓄᑐᐃᓐᓇᖅ ᑲᑐᔾᔨᖃᑎᒌᓪᓘᓐᓃᑦ ᑐᓴᕈᒪᑉᐸᑕ ᐃᓱᒪᒋᔭᖃᖅᑲᑕᓘᓐᓃᑦ ᑭᓪᓕᓯᓂᐊᖅᑏᑦ ᐱᔾᔪᑎᖓᓐᓄᑦ ᐊᒻᒪᓗ ᑭᓪᓕᓯᓂᐊᖅᑎ ᐃᓱᒪᒋᔭᖃᖅᑲᑦ ᑕᐃᒃᑯᐊ ᑐᓴᖅᑕᐅᔪᒪᔪᑦ ᐃᓱᒪᒋᔭᐅᔪᓪᓗ ᐃᓛᒃᑰᖓᒋᐊᖃᖅᑑᔮᖅᑲᑕ ᓴᖅᑭᖅᑕᐅᔪᑦ ᖃᐅᔨᓇᓱᓐᓂᖏᓐᓂ.

    ᑭᓇᑐᐃᓐᓇᑦᑎᐊᖅ ᑲᑐᔾᔨᖃᑎᒌᓪᓘᓐᓃᑦ ᐱᖃᑕᐅᔪᓐᓇᖅᑎᑕᐅᔪᒪᔪᑦ ᑎᓕᐅᖅᑕᐅᕗᑦ ᐱᓇᓱᐊᖁᔭᐅᓪᓗᑎᒃ 30 ᐅᓪᓗᐃᑦ ᓯᕗᓂᐊᒍᑦ ᓈᓚᓐᓂᖃᓚᐅᓐᖏᓐᓂᖏᓐᓂᒃ ᐱᖃᑕᐅᔪᒪᓂᐊᕈᑎᒃ. ᐱᓇᓱᐊᕈᑕᐅᔪᑦ ᑎᑎᖅᑲᐅᓗᑎᒃ ᐅᖄᓚᐅᑎᒃᑯᓘᓐᓃᑦ ᐅᐸᑦᑎᐊᒻᒪᕆᓪᓗᒋᓪᓘᓐᓃᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐊᓪᓚᕝᕕᖓᓐᓄᑦ ᑐᓂᔭᐅᔪᓐᓇᖅᑐᑦ. ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᖃᐅᔨᒋᐊᕐᕕᖃᐃᓐᓇᖃᑦᑕᓂᐊᖅᑐᑦ ᓄᓇᓕᓐᓂᑦ ᑐᓴᐅᒪᕙᓪᓕᐊᑎᑦᑎᔨᓂᒃ ᐊᒻᒪᓗ ᖃᐅᔨᒃᑲᐃᒐᔭᖅᑐᑎᒃ ᓇᓕᑐᐃᓐᓇᖏᓐᓂᒃ ᓄᓇᓕᐅᖃᑕᐅᔪᓂᑦ ᓇᓗᓇᐃᕐᓯᓯᒪᔪᓂᑦ ᐱᖃᑕᐅᔪᒪᓂᖏᓐᓂᒃ ᓈᓚᓐᓂᐅᔪᓂᑦ ᓄᓇᓕᓐᓂᑦ ᑐᓴᐅᒪᕙᓪᓕᐊᑎᑦᑎᔨᓄᑦ.

    ᐱᓇᓱᐊᕈᑏᑦ ᐱᖃᑕᐅᔪᒪᓂᕐᒧᑦ ᐱᖃᓯᐅᔾᔨᓯᒪᔭᕆᐊᓖᑦ ᑐᑭᓯᐅᒪᔾᔪᑎᔅᓴᓂᒃ ᐅᑯᓂᖓ:

    ᐃ) ᑐᑭᓯᒋᐊᕐᕕᐅᔪᓐᓇᕐᓃᑦ, ᓲᕐᓗ, ᐊᑏᑦ, ᑐᕌᕈᑏᑦ, ᐅᖄᓚᐅᑎᕕᑦ ᓱᑲᑦᑐᒃᑰᕈᑎᕕᓪᓗ ᓈᓴᐅᑖ, ᖃᕋᓴᐅᔭᒃᑯᑦ ᑐᕌᕈᑎᖏᑦ ᑭᒃᑯᑐᐃᓐᓇᐃᑦ; ᐊᒻᒪᓗ

    ᐱ) ᐃᓂᖏᑦ ᐱᔾᔪᑕᐅᔪᓪᓗ, ᐱᖃᓯᐅᑎᓪᓗᒋᑦ ᖃᖓᒃᑰᓂᕐᒪᖔᑕ, ᖃᓄᑎᒋ ᐃᓄᒃ ᑲᑐᔾᔨᖃᑎᒌᓪᓘᓐᓃᑦ ᐊᑦᑐᖅᑕᐅᓯᒪᓂᖃᕐᒪᖔᑕ ᐊᑦᑐᖅᑕᐅᓯᒪᓪᓚᕆᒻᒪᖔᖅ ᐃᓚᐃᓐᓇᖓᓂᓪᓘᓐᓃᑦ ᐅᕝᕙᓘᓐᓃᑦ ᐃᓄᒃ ᑲᑐᔾᔨᖃᑎᒌᓪᓘᓐᓃᑦ ᑕᒪᑐᒥᖓ ᑐᓴᕈᒪᓪᓚᕆᒻᒪᖔᑕ ᐃᓱᒪᒋᔭᖃᓪᓚᕆᒻᒪᖔᑕᓘᓐᓃᑦ ᐱᕚᓪᓕᑎᑦᑎᓂᐊᖅᑐᒥᒃ ᑭᓪᓕᓯᓂᐊᖅᑎᒧᑦ ᐊᒻᒪᓗ ᐱᔾᔪᑎᖏᑦ ᐃᑲᔪᕐᓰᒍᑎᒋᓂᐊᖅᑕᖏᑦ;

    ᑭᓪᓕᓯᓂᐊᖅᑎ ᖃᐅᔨᒐᔭᖅᑐᖅ ᒪᓕᑦᑕᐅᔭᕆᐊᖃᕐᓂᐊᖅᑐᓂᒃ ᐊᒻᒪᓗ/ᐅᕝᕙᓘᓐᓃᑦ ᖃᓄᐃᓕᖓᓂᕆᔭᐅᓂᐊᖅᑐᓂᒃ ᐃᓅᑉ ᑲᑐᔾᔨᖃᑎᒌᓪᓘᓐᓃᑦ ᐃᓚᐅᕕᒋᓂᐊᖅᑕᖓᓂ ᐊᒻᒪᓗ ᑕᐃᒃᑯᐊ ᐃᓚᖏᑦ ᖃᐅᔨᓇᓱᐊᕈᑕᐅᔪᑦ ᐃᓅᑉ ᑲᑐᔾᔨᖃᑎᒌᓪᓘᓐᓃᑦ ᐱᖃᑕᐅᕕᒋᑐᐃᓐᓇᕆᐊᓕᖏᑦ.

    ᑭᓪᓕᓯᓂᐊᖅᑎ ᐃᒪᐃᒍᓐᓇᖅᑐᖅ, ᓇᒻᒥᓂᖅ ᐱᔪᒪᓂᖓ ᒪᓕᓪᓗᒍ ᐊᒻᒪᓗ ᖃᖓᑐᐃᓐᓇᑦᑎᐊᖅ ᐱᔪᓐᓇᑎᑦᑎᓗᓂ, ᐲᕐᓯᓗᓂ ᐱᔪᓐᓇᐅᑎᒋᔭᐅᔪᒥᒃ ᐱᖃᑕᐅᓂᕐᒧᑦ ᐃᓄᒻᒥᑦ ᑲᑐᔾᔨᖃᑎᒌᓂᓪᓘᓐᓃᑦ, ᐅᕝᕙᓘᓐᓃᑦ ᐋᖅᑭᒋᐊᕐᓯᒪᓗᓂ ᒪᓕᑦᑕᐅᔭᕆᐊᖃᕐᓂᐊᖅᑐᓂᒃ ᐱᖃᑕᐅᓂᕐᒧᑦ.

ᐃᑲᔪᕐᓂᖅ

19. ᐱᔾᔪᑎᒋᓪᓗᒍ ᖃᐅᔨᓇᓱᐊᕐᓂᖅ, ᐱᖃᑕᐅᔪᑦ ᐱᖃᑕᐅᔪᓐᓇᕋᔭᓐᖏᑦᑐᑦ ᓈᓚᓐᓂᕐᓂᑦ ᐃᑲᔪᖅᑕᐅᔪᒪᒍᓐᓇᖅᑐᑦ ᐱᓇᓱᐊᕈᒻᒥᑦ ᑎᑎᕋᕐᓂᕐᒥᒃ ᑭᓪᓕᓯᓂᐊᖅᑎᓄᑦ 30 ᐅᓪᓗᐃᑦ ᓯᕗᕐᖓᒍᑦ ᐋᖅᑭᓯᒪᓂᖓᑕ ᓈᓚᓐᓂᕆᓛᖅᑕᖓᑕ, ᐅᕝᕙᓘᓐᓃᑦ ᐱᖁᔨᓂᖓ ᒪᓕᓪᓗᒍ ᑭᓪᓕᓯᓂᐊᖅᑎᐅᑉ ᐊᓯᐊᒍᑦ ᐅᓪᓘᑉ. ᖃᓄᐃᑦᑑᓂᖓ ᐃᑲᔫᑕᐅᒐᔭᖅᑐᖅ ᑭᓪᓕᓯᓂᐊᖅᑎᐅᑉ ᐱᖁᔨᓂᖓ ᒪᓕᓪᓗᒍ ᐱᒐᔭᖅᑐᖅ.

20. ᑭᓪᓕᓯᓂᐊᖅᑎ ᑐᑭᑖᕈᑎᖃᖅᑲᑦ ᐃᑲᔪᖅᑕᐅᔭᕆᐊᖃᕐᓂᖓᓂᒃ, ᐃᑲᔪᖅᑕᐅᒐᔭᖅᑐᖅ ᒪᓕᓪᓗᒋᑦ ᐊᖏᖅᑕᐅᓯᒪᔪᑦ ᑮᓇᐅᔭᓕᕆᓂᕐᒧᑦ ᐊᑐᐊᒐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ.

ᖃᐅᔨᒪᔾᔪᑏᑦ

21. ᑭᓪᓕᓯᓂᐊᖅᑎ ᐱᔪᓐᓇᖅᑐᖅ ᖃᓄᐃᑦᑐᑐᐃᓐᓇᕐᓂᒃ ᖃᐅᔨᒪᔾᔪᑕᐅᓂᐊᖅᑐᓂᒃ ᑐᑭᓯᐅᒪᔾᔪᑕᐅᓂᐊᖅᑐᓂᓪᓘᓐᓃᑦ ᐃᓱᒪᒋᔭᖏᑦ ᐃᑲᔫᑎᖃᕐᓂᐊᖅᑐᒋᓪᓗᓂᒋᑦ ᐊᑐᖅᑎᑦᑎᓂᕐᒥᒃ ᐱᔾᔪᑎᖓᓐᓂᒃ ᖃᐅᔨᒪᔾᔪᑎᔅᓴᐃᑦ ᑐᑭᓯᐅᒪᔾᔪᑎᔅᓴᐃᓘᓐᓃᑦ ᓴᖅᑭᑕᔅᓴᐅᓂᐊᕋᓗᐊᖅᑲᑕ ᓴᖅᑭᑕᔅᓴᐅᓂᐊᓐᖏᒃᑲᓗᐊᖅᑲᑕᓘᓐᓃᑦ ᐃᖅᑲᖅᑐᐃᕕᒻᒥ.

22. ᑭᓪᓕᓯᓂᐊᖅᑎ, ᐱᖁᔨᓂᖓ ᒪᓪᓗᒍ, ᐊᖏᕈᓐᓇᖅᑐᖅ ᐃᓱᐊᓄᑦ ᐅᕝᕙᓘᓐᓃᑦ ᐊᑐᖅᑎᑦᑎᒐᔭᖅᑐᖅ ᖃᐅᔨᒪᔾᔪᑎᔅᓴᓂᒃ ᓈᒻᒪᒋᔭᖓᓂᒃ ᒪᓕᓪᓗᓂ.

ᐱᖃᑕᐅᔪᓂᒃ ᐊᐱᕐᓱᕐᓂᖅ

23. ᑭᓪᓕᓯᓂᐊᖅᑎᓄᑦ ᐃᖅᑲᓇᐃᔭᖅᑏᑦ ᐊᐱᕐᓱᕈᓐᓇᖅᑐᑦ ᑐᑭᓯᐅᒪᔾᔪᑎᔅᓴᖅᑕᓕᓐᓂᒃ ᑎᑎᖅᑲᖁᑎᓕᓐᓂᓘᓐᓃᑦ ᐱᔾᔪᑎᓕᓐᓂᒃ ᖃᐅᔨᓇᓱᐊᕈᑕᐅᔪᓂᒃ ᐊᒻᒪᓗ ᐊᑐᓕᖁᔨᔾᔪᑎᖃᖃᑦᑕᕋᔭᖅᑐᑦ ᑭᓪᓕᓯᓂᐊᖅᑎᒧᑦ ᑭᒃᑯᑐᐃᓐᓇᐃᑦ ᐱᖃᑕᐅᔪᓐᓇᖅᑎᑕᐅᖁᓪᓗᒋᑦ ᓈᓚᓐᓂᕐᒥᒃ.

ᐱᖃᑕᐅᔪᑦ

24. ᐱᖃᑕᐅᔪᑦ ᐅᓂᒃᑳᖅᑐᑦ ᐅᖃᐅᓯᖃᖃᑦᑕᕋᔭᖅᑐᑦ ᖃᐅᔨᓯᒪᔭᒥᓂᒃ ᓈᓚᓐᓂᕐᒥᒃ ᓱᓕᔪᖔᕐᓯᒪᓗᑎᒃ ᐅᕝᕙᓘᓐᓃᑦ ᓇᓗᓇᐃᑦᑎᐊᕐᓂᕋᕐᓗᑎᒃ ᐊᓯᐊᒍᑦ ᑎᓕᔭᐅᓯᒪᓗᑎᓪᓘᓐᓃᑦ ᑭᓪᓕᓯᓂᐊᖅᑎᒧᑦ ᐱᖁᔨᓂᖓ ᒪᓕᓪᓗᒍ.

25. ᐱᖃᑕᐅᔪᑦ ᑎᓕᐅᖅᑕᐅᕗᑦ ᐅᖃᐅᔾᔨᖃᑦᑕᖁᔭᐅᓪᓗᑎᒃ ᑭᓪᓕᓯᓂᐊᖅᑎᓂᒃ ᐊᑎᖏᓐᓂᒃ, ᑐᕌᕈᑎᖏᓐᓂᒃ ᐅᖄᓚᐅᑎᖏᑕ ᓈᓴᐅᑎᖏᓐᓂᒃ ᓇᓕᑐᐃᓐᓇᖏᓐᓂᒃ ᐊᓯᖏᓐᓂᒃ ᐱᖃᑕᐅᓂᐊᖅᑐᓂᒃ ᑐᑭᓯᐅᒪᔾᔪᑎᔅᓴᖅᑕᖃᓪᓚᕆᑦᑐᒋᔭᖏᓐᓂᒃ ᐱᔾᔪᑎᖓᓐᓄᑦ ᑭᓪᓕᓯᓂᐊᖅᑏᑦ.

26. ᓈᓚᓐᓃᑦ ᑕᕐᕆᔮᔅᓴᓕᐅᖅᑕᐅᑉᐸᑕ, ᐱᓇᓱᐊᕈᑎᓂᑦ ᑐᓂᓯᖃᑦᑕᕈᓐᓇᖅᑐᑦ ᖃᐅᔨᒪᔾᔪᑎᔅᓴᐃᑦ ᐱᖃᑕᐅᓂᐊᖅᑐᒥᒃ ᑕᕐᕆᔮᔅᓴᓕᐅᖅᑕᐅᖁᔭᐅᓐᖏᑉᐸᑕ ᓴᖅᑭᔮᖅᑎᑕᐅᖁᔭᐅᓐᖏᑉᐸᑕᓘᓐᓃᑦ.

ᐅᖃᐅᓯᐅᔪᓂᒃ ᖃᐅᔨᓴᕐᓂᖅ

27. ᐊᐅᓚᓂᖃᖅᑎᓪᓗᒋᑦ ᐱᓕᕆᔾᔪᑎᖏᓐᓂ, ᑭᓪᓕᓯᓂᐊᖅᑎ ᖃᐃᖁᔨᖃᑦᑕᓛᖅᑐᖅ ᐊᐱᕐᓱᖃᑦᑕᕐᓗᓂ ᐱᖃᑕᐅᔪᓂᒃ ᐅᓂᒃᑳᓂᐊᖅᑐᓂᒃ ᖃᐅᔨᓇᓱᓐᓂᖏᓐᓂ.

28. ᑭᓪᓕᓯᓂᐊᖅᑎ ᕿᐱᓗᒍᓐᓇᖅᑐᖅ ᖃᐃᖁᔨᔪᒪᓐᖏᓪᓗᓂ ᐱᖃᑕᐅᔪᒥᒃ ᐅᕝᕙᓘᓐᓃᑦ ᐱᕕᖃᖅᑎᓪᓗᒋᑦ ᐅᓂᒃᑳᓂᕐᒥᒃ.

29. ᐊᐱᕐᓱᓚᐅᖅᑎᓪᓗᒋᑦ ᐊᑭᓕᖔᖏᓐᓂᒃ ᐊᐱᕐᓱᖃᑦᑕᔾᔮᓛᓐᖏᑦᑐᑦ ᐱᖃᑕᐅᔪᓂᒃ ᓱᓕᒐᓗᐊᕐᒪᖔᑕ ᓱᓕᓐᖏᒻᒪᖔᑕᓘᓐᓃᑦ, ᒪᓕᓪᓗᒍ ᐱᖁᔨᓂᖓ ᑭᓪᓕᓯᓂᐊᖅᑎᐅᑉ ᐊᐱᕐᓱᕈᓐᓇᑎᑦᑎᖃᑦᑕᓛᖅᑐᖅ ᐱᖃᑕᐅᔪᖅ ᐊᐱᕐᓱᖅᑕᐅᑎᓪᓗᓂᐅᒃ ᑭᓪᓕᓯᓂᐊᖅᑎᐅᑉ ᐊᓯᐊᓄᑦ.

ᐊᑐᖅᑕᐅᓂᖏᑦ ᑎᑎᖅᑲᐃᑦ ᓈᓚᓐᓂᕐᓂᑦ

30. ᐱᖃᑕᐅᔪᑦ ᑐᓂᓯᔪᓐᓇᕋᔭᖅᑐᑦ ᑭᓪᓕᓯᓂᐊᖅᑎᓄᑦ ᖃᓄᐃᑦᑐᑐᐃᓐᓇᕐᓂᒃ ᑎᑎᖅᑲᓂᒃ ᓴᖅᑭᕈᒪᒐᔭᖅᑕᖏᓐᓂᒃ ᑕᑯᔭᔅᓴᐅᑎᓪᓗᒋᑦ ᐅᕝᕙᓘᓐᓃᑦ ᐅᖃᐅᓯᕆᒍᒪᒐᔭᖅᑕᖏᓐᓂᒃ ᓈᓚᓐᓂᖃᖅᑎᓪᓗᒋᑦ ᓯᕗᓂᐊᒍ5 ᑲᒪᓯᒪᑦᑕᐅᑎᒋᑉᐸᑕ ᐱᐅᓂᖅᐹᖑᖃᑦᑕᕋᔭᖅᑐᖅ.

31. ᓇᓕᖅᑲᖏᑦ ᑎᑎᖅᑲᐃᑦ

    ᑭᓪᓕᓯᓂᐊᖅᑏᑦ ᓇᓕᖅᑲᓕᐅᕈᓐᓇᑦᑎᐊᕋᔭᖅᑐᑦ ᑎᑎᖅᑲᖁᑎᓂᒃ. ᑎᑎᖅᑲᖁᑎᒋᔭᐅᓪᓚᑦᑖᖅᑐᑦ ᐅᑎᖅᑎᑕᐅᖃᑦᑕᕋᔭᖅᑐᑦ ᐱᖃᑕᐅᔪᒧᑦ.

32. ᐊᑐᖅᑕᐅᓂᖏᑦ ᑎᑎᖅᑲᐃᑦ ᐅᓂᒃᑳᓕᐊᓂᒃ.

    ᐱᖃᑕᐅᔪᖅ ᐊᖏᕐᓗᓂ ᐱᔪᓐᓇᑎᑦᑎᓂᕐᒧᑦ ᑭᓪᓕᓯᓂᐊᖅᓂᒃ ᓴᓇᔭᐅᓕᖅᑭᑎᑦᑎᓂᕐᒥᒃ ᐃᓘᓐᓇᖏᓐᓂᒃ ᐃᓚᐃᓐᓇᖓᓂᓪᓘᓐᓃᑦ ᑐᓂᓯᒪᔭᖏᓐᓂᒃ ᑎᑎᖅᑲᓂᒃ ᐅᓂᒃᑳᓕᐊᓄᑦ.

ᓇᒻᒥᓂᖅ ᑲᓐᖑᓇᖅᑐᒦᑎᓐᓂᖅ

33. ᐱᓇᓱᐊᖅᑎᓪᓗᒋᑦ, ᑭᓪᓕᓯᓂᐊᖅᑎ ᑎᓕᓯᔪᓐᓇᖅᑐᖅ ᐊᑐᖁᔨᓗᓂ “ᑲᓐᖑᓇᖅᑐᒦᒋᐊᖃᕐᓂᖏᓐᓂᒃ”, ᓴᐳᑎᓗᒍ ᑭᓇᐅᓂᖓ ᑭᓇᑐᐃᓐᓇᐅᑉ ᐃᓅᑉ. ᐱᔾᔪᑎᒋᓪᓗᒍ ᖃᐅᔨᓇᓱᓐᓂᖅ, ᓇᒻᒥᓂᖅ ᑲᓐᖑᓇᖅᑐᒦᑎᓐᓂᖅ ᐱᖃᓯᐅᔾᔨᔪᖅ ᐱᔪᓐᓇᐅᑎᖓᓐᓂᒃ ᑭᓇᑐᐃᓐᓇᐅᑉ ᐃᓅᑉ ᐊᕐᓇᐅᑉᐸᑦ ᐊᖑᑕᐅᒐᓗᐊᖅᑲᓘᓐᓃᑦ ᑭᓇᐅᓂᖓ ᓴᖅᑭᖅᑕᐅᒍᓐᓇᕋᔭᖅᑐᖅ ᓇᓗᓇᐃᓐᖏᓪᓗᒋᑦ ᐱᒋᐊᓐᖓᕐᓂᖏᑦ ᐊᑎᖏᑕ, ᐊᒻᒪᓗ, ᑭᓪᓕᓯᓂᐊᖅᑎ ᐱᖁᔨᓂᖓᓄᑦ, ᐱᔪᓐᓇᐅᑎᖃᕐᖓᑕ ᐅᖃᐅᓯᖃᕐᓂᕐᒥᒃ ᑭᓪᓕᓯᓂᐊᖅᑏᑦ ᓵᖓᓄᑦ ᒪᑐᓯᒪᔪᒥᒃ, ᐊᑕᐅᑦᑎᒃᑯᑦ ᐊᓯᖏᓐᓂᒃ ᑲᓐᖑᓇᖅᑐᒃᑰᕈᑕᐅᔪᓂᑦ ᑭᓪᓕᓯᓂᐊᖅᑎᓄᑦ ᐱᔪᓐᓇᖅᑎᑕᐅᑎᓪᓗᒋᑦ.

34. ᐱᓇᓱᐊᖅᑎᓪᓗᒋᑦ, ᑭᓪᓕᓯᓂᐊᖅᑎ ᑎᓕᓯᔪᓐᓇᖅᑐᖅ ᓈᓚᓐᓂᖃᖁᔨᓗᓂ ᒪᑐᓯᒪᔪᒥᒃ ᐃᓱᒪᒋᔭᖃᕈᓂ ᑲᓐᖑᓇᖅᑑᓱᒋᑦᑎᒍᑎᒃ ᑮᓇᐅᔭᓕᕆᔾᔪᑎᓂᒃ, ᓇᒻᒥᓂᖅ ᐱᔾᔪᑕᐅᔪᓂᒃ ᐊᓯᖏᓐᓂᓘᓐᓃᑦ ᐱᔾᔪᑕᐅᔪᓂᒃ ᐃᑉᐱᓐᓇᓗᐊᕐᓴᕈᑎᒃ, ᖃᓄᐃᓐᓂᖏᓐᓂᒃ ᐱᔾᔪᑎᖃᖅᑲᑕ, ᓴᖅᑭᖅᑎᑕᐅᖁᔨᓐᖏᒃᑯᑎᒃ ᓴᖅᑭᕆᐊᖃᓐᖏᓪᓚᕆᑦᑐᓂᒃ ᓈᒻᒪᖏᑉᐸᑕᓗ ᒪᓕᑦᑕᐅᔭᕆᐊᖃᕐᓯᒪᔪᓂᒃ ᐃᓘᓐᓇᖏᓐᓄᑦ ᓈᓚᓐᓂᐅᓂᐊᕐᓯᒪᔪᓄᑦ ᒪᑐᐃᖓᔪᒥᒃ ᑭᒃᑯᑐᐃᓐᓇᕐᓄᑦ.

35. ᑐᓴᕋᔅᓴᑎᒍᑦ ᐅᓂᒃᑳᑦ ᐱᔾᔪᑎᒋᓪᓗᒍ ᐃᓄᒃ ᐊᖏᖅᑕᐅᓯᒪᔪᖅ ᓇᒻᒥᓂᖅ ᑲᓐᖑᓇᖅᑐᒦᒋᐊᖃᖅᑐᒋᓂᖓᓂᒃ ᐊᑎᖏᓐᓂᒃ ᐱᖃᓯᐅᔾᔨᓯᒪᖃᑦᑕᔾᔮᖏᑦᑐᑦ ᓇᓗᓇᐃᕈᑕᐅᑐᐃᓐᓇᕆᓕᓐᓂᒃ ᑭᓇᐅᓂᖓᓂᒃ. ᐊᔾᔨᓐᖑᐊᓂᒃ ᐊᓯᖏᓐᓂᓘᓐᓃᑦ ᓴᖅᑭᔮᕈᑎᒋᑐᐃᓐᓇᕆᐊᓕᓐᓂᒃ ᐃᓅᑉ ᐊᖏᖅᑕᐅᓯᒪᔫᑉ ᑲᓐᖑᓇᖅᑐᒦᒍᓐᓇᕐᓂᖓᓂᒃ ᓴᖅᑭᑎᑦᑎᔪᖃᔾᔮᖏᑦᑐᖅ ᐃᓄᒃ ᐅᖃᐅᓯᖃᖅᑎᓪᓗᒍ ᐅᕝᕙᓘᓐᓃᑦ ᐃᓯᖅᑎᓪᓗᒍ ᐊᓂᑎᓪᓗᒍᓗ ᖃᐅᔨᓇᓱᕝᕕᐅᔪᒥ.

36. ᑭᓇᑐᐃᓐᓇᖅ ᐱᖃᑕᐅᔪᖅ ᐊᖏᖅᑕᐅᔪᖅ ᑲᓐᖑᓇᖅᑐᒦᒍᓐᓇᕐᓂᖓᓂᒃ ᓱᓕᕗᖔᕈᓐᓇᖅᑐᖅ ᐅᕝᕙᓘᓐᓃᑦ ᓇᓗᓇᐃᕐᓯᓗᓂ ᐅᖃᓪᓚᑦᑖᓂᐊᕐᓂᕋᕐᓗᓂ ᓱᓕᔪᓂᒃ ᐊᑐᕐᓗᓂ ᓇᓗᓇᐃᕈᑕᐅᔾᔮᖏᑦᑐᓂᒃ ᐊᑎᖓᑕ ᐱᒋᐊᓐᖓᕐᓂᖏᓐᓂᒃ ᐱᔾᔪᑎᒋᓪᓗᒍ ᐱᖃᑕᐅᔫᑉ ᐅᖃᐅᓯᖃᕐᓂᐊᕐᓂᖓ.

37. ᑭᒃᑯᑐᐃᓐᓇᐃᑦ ᐱᖃᑕᐅᔪᑦ ᐱᓇᓱᐊᕈᓐᓇᖅᑐᑦ ᑭᓪᓕᓯᓂᐊᖅᑎᒧᑦ ᑲᓐᖑᓇᓗᐊᖅᑐᑦ ᑮᓇᐅᔭᓕᕆᓂᕐᒧᑦ ᐃᓅᓪᓘᓐᓃᑦ ᒥᔅᓵᓄᑦ ᑐᑭᓯᐅᒪᔾᔪᑎᔅᓴᐃᑦ ᐱᔾᔪᑎᖃᓐᖏᑦᑐᑦ ᖃᐅᔨᓇᓱᐊᕈᑕᐅᔪᒥ ᓇᑲᑎᖅᑕᐅᓯᒪᖁᓗᒋᑦ ᑎᑎᖅᑲᓂᑦ ᓴᖅᑭᖅᑕᐅᔪᒪᓯᒪᔪᓂᒃ ᖃᐅᔨᒪᔾᔪᑎᔅᓴᐅᓂᐊᖅᑐᓂᒃ.

38. ᐃᓘᓐᓇᓂᒃ ᑐᓴᕋᔅᓴᓕᕆᔩᑦ ᑲᒪᔪᓐᓇᖅᑎᑕᐅᓛᖅᑐᑦ ᒪᓕᓐᓂᕐᒥᒃ ᒪᓕᒐᕐᓂᑦ ᐱᔾᔪᑎᒋᓪᓗᒋᑦ ᓇᒻᒥᓂᖅ ᑲᓐᖑᓇᖅᑐᒦᒍᒪᓯᒪᓂᖅ. ᓱᕋᐃᑉᐸᑕ ᒪᓕᒐᕐᓂᑦ ᑐᓴᕋᔅᓴᓕᕆᔩᑦ ᑲᒪᒋᔭᐅᒐᔭᖅᑐᑦ ᑭᓪᓕᓯᓂᐊᖅᑎᒧᑦ ᑕᒪᑐᒥᖓ ᐃᓱᒪᒋᔭᖃᕐᓂᖓ ᒪᓕᓪᓗᒍ.

ᑕᑯᔪᓐᓇᕐᓂᖅ ᖃᐅᔨᔾᔪᑎᔅᓴᓂᑦ

39. ᐃᓗᓐᓇᑎᒃ ᖃᐅᔨᔾᔪᑎᔅᓴᐃᑦ ᐃᓂᖏᓐᓅᖅᑲᖅᑕᐅᒐᔭᖅᑐᑦ ᐊᒻᒪᓗ ᓇᓗᓇᐃᒃᑯᓯᖅᑕᐅᓯᒪᓗᑎᒃ ᑭ ᑭᒃᑯᑐᐃᓐᓇᕐᓄᑦ ᓈᓚᓐᓂᐅᔪᓄᑦ ᐊᒻᒪᓗ ᑲ ᑲᓐᖑᓇᖅᑐᒦᑦᑐᓄᑦ ᓈᓚᓐᓂᕐᓄᑦ.

40. ᐊᑕᐅᓯᖅ ᓇᓕᖅᑲᖅ ᑭᒃᑯᑐᐃᓐᓇᕐᓂᑦ ᓈᓚᒍᑎᒥᓂᕐᓄᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ ᑕᑯᔅᓴᐅᑎᑕᐅᔪᓄᑦ ᑭᒃᑯᑐᐃᓐᓇᕐᓂᑦ ᓈᓚᓐᓂᕐᓂᑦ ᐊᑐᐃᓐᓇᐅᑎᑦᑎᖃᑦᑕᓛᖅᑐᑦ ᑭᒃᑯᑐᐃᓐᓇᕐᓄᑦ ᕿᒥᕐᕈᔭᔅᓴᐅᓗᑎᒃ ᑭᓪᓕᓯᓂᐊᖅᑏᑦ ᐊᓪᓚᕝᕕᖏᓐᓂᒃ. ᑭᓪᓕᓯᓂᐊᖅᑎ, ᐱᖁᔨᓂᖓ ᒪᓕᓪᓗᒍ, ᑎᑎᕋᓕᖅᑭᒍᓐᓇᖅᑐᖅ ᓇᓪᓕᐊᓐᓂᑐᐃᓐᓇᖅ, ᐃᓘᓐᓇᖏᓐᓂᒃ ᐃᓚᐃᓐᓇᖓᓂᓪᓘᓐᓃᑦ, ᖃᐅᔨᒪᔾᔪᑎᔅᓇᓂᑦ ᑭᓪᓕᓯᓂᐊᖅᑏᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓂ.

41. ᑕᐃᒃᑯᐊᑐᐊᖅ ᐱᔪᓐᓇᖅᑎᑕᐅᔪᑦ ᑭᓪᓕᓯᓂᐊᖅᑎᓄᑦ, ᑎᑎᖅᑲᑎᒍᑦ, ᐱᔪᓐᓇᖃᑦᑕᕋᔭᖅᑐᑦ ᑲᓐᖑᓇᖅᑐᓂᒃ ᑎᑎᕋᖅᑕᐅᓯᒪᖤᑦ ᑕᑯᔭᔅᓴᐅᔪᓂᓪᓗ.

ᓴᐳᑎᔭᐅᓗᑎᒃ ᐃᖅᑲᖅᑐᐃᕕᓕᐊᕈᔾᔭᐅᔭᕆᐊᖃᓐᖏᓂᕐᒥᒃ

42. ᑐᔅᓯᕋᐅᑏᑦ ᓴᐳᑎᔭᐅᔪᒪᓂᕐᒧᑦ ᐃᖅᑲᖅᑐᐃᕕᓕᐊᕈᔾᔭᐅᔭᕆᐊᖃᓐᖏᓂᕐᒧᑦ ᑎᑎᖅᑲᐅᓗᒋᑦ ᑐᓂᔭᐅᖃᑦᑕᕆᐊᖃᕋᔭᖅᑐᑦ ᑭᓪᓕᓯᓂᐊᖅᑎᒧᑦ.

43. ᑭᓪᓕᓯᓂᐊᖅᑎ, ᐱᖁᔨᓂᖓ ᒪᓕᓪᓗᒍ, ᐊᑐᓕᖁᔨᔾᔪᑎᖃᕈᓐᓇᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᓴᐳᔾᔭᐅᖁᔨᓗᓂ ᑭᓇᑐᐃᓐᓇᕐᒥᒃ ᐅᖃᐅᓯᖃᕐᓯᒪᔪᒥᒃ ᐃᓗᐃᑦᑐᒥᒃ ᐊᑐᕐᓯᒪᔪᓂᑦ ᑕᐃᒫᒃ ᑐᑭᑖᕈᑕᐅᓯᒪᒻᒪᑦ ᑭᓪᓕᓯᓂᐊᖅᑎᒧᑦ, ᐱᔾᔪᑎᒋᓪᓗᒋᑦ ᖃᓄᐃᓕᐅᕈᑕᐅᓯᒪᔪᑦ ᐱᔾᔪᑎᖓᓐᓂ ᑭᓪᓕᓯᓂᐊᖅᑏᑦ.

ᐅᖃᖃᑎᖃᕐᓯᒪᓂᕐᒧᑦ ᑎᑎᖅᑲᐃᑦ, ᐊᑐᐊᒐᕐᓂᑦ ᑲᑎᒪᒍᑎᖃᕐᓂᖅ, ᑭᒃᑯᑐᐃᓐᓇᓂᓪᓗ ᑲᑎᒪᑎᑦᑎᓂᖅ

44. ᑭᓪᓕᓯᓂᐊᖅᑎ, ᐱᔪᒪᓂᖓ ᒪᓕᓪᓗᒍ, ᐱᔪᓐᓇᑎᑦᑎᔪᓐᓇᖅᑐᖅ ᐊᑐᖅᑎᑦᑎᔪᓐᓇᓂᕐᒥᒃ ᐅᖃᖃᑎᒌᓐᓂᐅᑉ ᒥᔅᓵᓄᑦ ᑎᑎᖅᑲᓂᑦ, ᐊᒻᒪᓗ/ᐅᕝᕙᓘᓐᓃᑦ ᐋᖅᑮᓂᕐᒥᒃ ᖃᐅᔨᒪᔪᒻᒪᕆᓐᓂᑦ ᐊᑐᐊᒐᐃᑦ ᒥᔅᓵᓄᑦ ᑲᑎᒪᑎᑦᑎᓂᕐᒥᒃ ᐅᕝᕙᓘᓐᓃᑦ ᑭᒃᑯᑐᐃᓐᓇᕐᓂᑦ ᑲᑎᒪᑎᑦᑎᓂᕐᒥᒃ ᐊᑐᖅᑕᐅᒐᔭᖅᑐᓂᒃ ᐅᐸᓗᖓᐃᔭᕈᑎᖃᕐᓂᕐᒥᒃ ᑭᓪᓕᓯᓂᐊᖅᑏᑦ ᐅᓂᒃᑳᓕᐊᔅᓴᖏᓐᓂᒃ.

45. ᑭᓪᓕᓯᓂᐊᖅᑎ ᐋᖅᑮᔪᓐᓇᖅᑐᖅ ᑭᒃᑯᑐᐃᓐᓇᕐᓂᑦ ᑲᓐᖑᓇᖅᑐᒥᓘᓐᓃᑦ ᑲᑎᒪᑎᑦᑎᓂᐅᒐᔭᖅᑐᓂᒃ ᑐᓴᕋᔭᕐᖓᑕ ᑐᓂᔭᐅᓯᒪᔪᓂᑦ ᐱᔾᔪᑎᒋᓪᓗᒋᑦ ᓇᓕᑐᐃᓐᓇᖏᑦ ᐱᔾᔪᑕᐅᔪᑦ ᓴᖅᑭᖅᑕᒥᓃᑦ ᓇᓪᓕᐊᓐᓂᑐᐃᓐᓇᖅ ᓈᓚᓐᓂᐅᔪᓂᑦ. ᐱᑕᐅᔪᑦ ᑲᑎᒪᓂᕐᒥ ᐱᖃᓯᐅᔾᔨᒍᓐᓇᖅᑐᑦ ᑭᒃᑯᑐᐃᓐᓇᑦᑎᐊᓂᒃ ᑭᓪᓕᓯᓂᐊᖅᑎᐅᑉ ᐃᑲᔫᑎᖃᕐᓂᐊᕐᓂᕋᖅᑕᖏᓐᓂᒃ ᑲᒪᒋᔭᖓᓐᓄᑦ.

ᑐᓴᕋᔅᓴᓕᕆᔨᓄᑦ ᑲᒪᒋᔭᐅᓂᖓ

46. ᑐᓴᕋᔅᓴᓕᕆᔩᑦ ᒪᓕᒋᐊᖃᕋᔭᖅᑐᑦ ᒪᓕᒐᕐᓂᑦ ᐊᒻᒪᓗ ᑭᓪᓕᓯᓂᐊᖅᑏᑦ ᑎᓕᓯᒍᑎᒋᕙᑦᑕᖏᓐᓂᒃ.

47. ᑭᓪᓕᓯᓂᐊᖅᑏᑦ ᑐᑭᑖᕈᑎᖃᑐᐊᕋᐃᑉᐸᑕ ᒪᑐᓯᒪᔪᒥᒃ ᑲᑎᒪᓂᐊᕐᓂᖏᓐᓂᒃ, ᐅᕝᕙᓘᓐᓃᑦ ᓴᖅᑭᖅᑎᑕᐅᖁᔨᓐᖏᑉᐸᑕ, ᐅᖃᐅᓯᐅᖁᔨᓐᖏᑉᐸᑕ ᑐᓴᖅᑎᑦᑎᖁᔨᓐᖏᑉᐸᑕᓘᓐᓃᑦ, ᑎᓕᔭᐅᓯᒪᔪᑦ ᑐᓴᕋᔅᓴᓕᕆᔩᑦ ᐃᒪᐃᒋᐊᖃᕋᔭᖅᑐᑦ, ᖃᓄᐃᔅᓴᖏᓐᓂᖏᑦ ᑭᓪᓕᓯᓂᐊᖅᑏᑦ ᒪᓕᓪᓗᒋᑦ, ᐊᑐᕆᐊᖃᖅᑕᓕᒫᖏᓐᓂᒃ ᐊᑐᖃᑦᑕᕋᔭᖅᑐᑦ ᖃᐅᔨᒪᒋᐊᕐᓗᑎᒃ ᐃᓘᓐᓇᑎᒃ ᓂᐱᓕᐅᖅᑕᐅᔪᑦ ᐅᕝᕙᓘᓐᓃᑦ ᓂᐱᓕᐅᕈᑎᓕᒫᑦ ᖃᒥᑕᐅᓯᒪᒐᓗᐊᕐᒪᖔᑕ ᐊᒻᒪᓗ ᑎᑎᕋᖅᑐᖃᓐᖏᒃᑲᓗᐊᕐᒪᖔᑕ.