ᔨᒻ ᐃᒡᓗᓕᐅᖅᑎ

ᑲᒥᓯᓇ ᔭᐃᒥᓯ ᐃᒡᓗᓕᐅᖅᑎ. ᐸᓐᓂᖅᑐᖅ, 2008. ᐊᔾᔨᓕᐊᕕᓂᖅ ᑐᓂᓯᒪᔭᖓ ᕌᐳᑦ ᕼᐅᓪᑕᓐ, No Barriers−ᑯᓐᓂ ᐊᔾᔨᓕᐅᕆᔨᓂ.

ᔨᒻ ᐃᒡᓗᓕᐅᖅᑎ ᐃᖃᖅᑐᐃᔨᕕᓂᐅᕗᖅ, ᐊᒻᒪᓗ ᐊᖓᔪᖃᕆᔭᐅᓪᓗᓂ ᑲᒥᓴᓐᑯᓐᓄᑦ ᕿᑭᖅᑕᓂ ᓱᓕᔪᓂᒃ ᑭᒡᓕᓯᓂᐊᖅᑎᓂᒃ.

ᓚ ᐸᑐᐊᕆᒥᐅᑕᖅ ᐃᓄᒃ, ᔩᒻ ᐃᓅᓚᐅᖅᓯᒪᔪᖅ ᕼᐆᑉᑎᓕᒥ. ᐃᓕᓐᓂᐊᕆᐊᖅᓯᒪᔪᖅ Memoral University−ᒥ ᔫᓂᕘᓯᑎᒥ ᐊᒻᒪᓗ ᐃᓕᓐᓂᐊᓂᓚᐅᖅᓱᓂ ᓇᓗᓇᐃᒃᑯᑕᖅᑖᖅᓯᒪᑦᑎᐊᖅᓱᓂ ᖃᐅᔨᓴᐃᓂᕐᒥᒃ ᐊᒻᒪᓗ ᐃᓕᓐᓂᐊᖅᑐᓕᕆᓂᕐᒥᒃ. ᐃᖃᓇᐃᔭᓕᓚᐅᖅᐳᖅ ᐃᓕᓴᔨᐃᐅᓪᓗᓂ ᐊᒻᒪᓗ ᐊᖓᔪᖃᕐᒧᑦ ᔨᒻ ᐱᓕᕆᐊᒋᓕᓚᐅᖅᓯᒪᔪᖅ ᒪᓕᒐᓕᕆᔨᐅᓂᕐᒥᒃ ᐃᖃᓇᐃᔮᒥᓂᒃ 1980-ᖑᑎᓪᓗᒍ, ᐊᐱᕆᔭᐅᒐᒥ ᐃᖃᓇᐃᔭᕐᕕᖕᒥᐅᓄ ᐃᖃᖅᑐᐃᕕᓕᕆᓂᕐᒧᑦ ᐱᓕᕆᖁᔭᐅᓪᓗᓂ ᐃᖃᖅᑐᐃᔨᐅᓂᕐᒥᒃ. ᐃᓕᓐᓂᐊᕌᓂᓚᐅᖅᓯᒪᔪᖅ ᑎᑎᖃᖅᑖᖅᓱᓂ ᑖᓪᕼᐅᓯᑉ ᔫᓂᕘᓯᑎᖓᓂᒃ 1985−ᖑᑎᓪᓗᒍ, ᐊᒻᒪᓗ ᑎᒃᑯᐊᖅᑕᐅᓚᐅᖅᓯᒪᔪᖅ ᑎᑭᖃᑦᑕᖅᑐᓄᑦ ᐃᖃᖅᑐᐃᔨᐅᓄᑦ ᓚᐸᑐᐊᕆᐅᑉ ᓯᒡᔭᐅᒥᖏᓐᓄᑦ. ᑕᐃᔅᓱᒪᓂᑦᓴᐃᓐᓇᖅ ᐊᕐᕋᒍᒥ, ᐃᖃᖅᑐᐃᔨᖑᓚᐅᖅᓯᒪᔪᖅ ᑕᒪᐃᓐᓄᑦ ᓚᐸᑐᐊᕆᒧᑦ, ᐃᖃᓇᐃᔮᓕᖅᓱᑎᒃ ᑎᑭᓪᓗᒍ 1993-ᒧᑦ. ᑭᖑᓂᐊ ᑕᒪᑐᒪ, ᔨᒻ ᐱᓕᕆᓚᐅᖅᑐᖅ ᑯᐊᓄ ᐳᓗᒃᒥ ᐊᒻᒪᓗ ᓄᐊᑕᓐ ᐱᓂᓐᓱᓚᒥ.

ᔨᒻ ᐱᓕᕆᖃᑦᑕᐃᓐᓇᖅᓯᒪᔪᖅ ᐅᔾᔨᖅᑐᕐᓂᕐᒧᑦ ᐃᓕᖅᑯᓯᕆᔭᐅᔪᑦ ᐊᒻᒪᓗ ᐱᖁᓯᕆᔭᐅᔪᑦ ᐃᓄᖕᓄᑦ ᓄᓇᖃᖃᖅᑐᓕᒫᓄᓪᓗ ᐃᒃᐱᒋᔭᐅᑦᑎᐊᖁᓪᓗᒋᑦ ᐃᖃᖅᑐᐃᕕᖕᒥ ᐱᖅᑯᓯᕆᔭᐅᔪᓂ. ᐊᒃᓱᕈᖅᐸᖕᒥᔪᖅ ᐅᔾᔨᖅᑐᕐᓂᕐᒧᑦ ᓄᓇᖃᖃᖅᑐᑦ ᐃᖃᖅᑐᐃᕕᖕᓃᑦᑐᑦ ᑐᑭᓯᐅᒪᑦᑎᐊᕆᐊᖃᕐᓂᖏᓐᓂᒃ ᐱᖅᑯᓯᕆᔭᕙᒃᑐᓂᒃ ᐊᑐᖅᑕᐅᕙᒃᑐᓂ ᑲᓇᑕᒥ ᐃᖃᖅᑐᐃᕕᖕᓂ, ᐊᒻᒪᓗ ᐱᔪᓐᓇᐅᑎᖃᕐᓂᖏᓐᓂᒃ ᑖᒃᑯᐊ ᐱᖅᑯᓯᕆᔭᐅᔪᑦ ᐊᑐᖅᑕᐅᓂᖏᓐᓂ.

1999−ᒥ, ᔨᒻ ᑐᓂᔭᐅᓚᐅᖅᓯᒪᔪᖅ ᑲᓇᑕᓕᒫᒥ ᓄᓇᖃᖄᖅᑐᑦ ᐱᓕᕆᑦᑎᐊᕌᓂᒃᓯᒪᓂᖏᓐᓄᑦ ᓇᓗᓇᐃᒃᑯᑕᕐᓂᒃ ᐱᔾᔪᑎᖃᖅᑐᓂᒃ ᒪᓕᒐᓕᕆᔪᓂᒃ ᐊᒻᒪᓗ ᐃᖅᑲᖅᑐᐃᕕᓕᕆᔪᓂ. ᐱᓯᒪᖕᒥᔪᖅ ᖃᖓᓕᒫᖅ ᒪᓕᒐᓕᕆᔨᐅᑎᑕᐅᓂᕐᒥᒃ ᒥᒧᐊᕆᔫᑉ ᔫᓂᕘᓯᑎᖓᓂᒃ.

ᒪᑕᓕᓐ ᕆᐊᑦᕘᓐ

ᒪᑕᓕᓐ ᕆᐊᑦᕘᓐ ᐃᖃᓗᖕᒥᐅᑕᑐᖃᐅᕗᖅ ᓄᓇᕗᒻᒥ. ᒪᑕᓕᓐ ᑲᔪᓯᓯᒪᑦᑎᐊᖅᑐᒥᒃ ᓇᖕᒥᓂᖃᖅᑎᐅᓯᒪᕗᖅ. ᐃᓕᓐᓂᐊᕌᓂᒃᓯᒪᖕᒥᔪᖅ ᐊᑭᑦᓯᕋᒃᑯᑦ ᒪᓕᒐᓕᕆᕕᖓᓐᓂᒃ ᓇᓗᓇᐃᒃᑯᑕᖃᓕᖅᓱᓂ ᔫᓂᕘᓯᑎᒥᒃ ᐳᕆᑎᔅ ᑲᓚᒻᐱᔭᒥ. ᒫᑕᓕᓐ ᐃᖃᓇᐃᔭᕆᐅᖅᓴᓚᐅᖅᑐᖅ ᒪᓕᒐᓕᕆᔨᐅᓂᕐᒥᒃ ᐱᓕᕆᓗᓂ ᐊᑖᓂ ᐃᖃᖅᑐᐃᔨᐅᑉ ᓴᐅᕆᓐ, ᐃᖃᖅᑐᐃᕕᕐᔪᐊᒃᑯᓐᓂ ᑲᓇᑕᒥ. ᐱᓕᕆᓚᐅᖅᓯᒪᖕᒥᔪᖅ ᒪᓕᒐᕐᓂᒃ ᑐᑭᓯᓂᐊᖅᑎᐅᓂᕐᒥᒃ ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᓂᒃ. ᒫᑎᓕᓐ ᒫᓇᐅᔪᖅ ᐃᖅᑲᓇᐃᔭᓕᖅᑐᖅ ᐊᐅᓚᑦᑎᔨᒻᒪᕆᐅᓂᕐᒧᑦ ᐃᖃᓇᐃᔭᖅᑎᓂ ᕿᑭᖅᑕᓂ ᓱᓕᔪᖅᓯᐅᖅᑎᑦ ᑭᒡᓕᓯᓂᐊᖅᑎᒃᑯᖏᓐᓂ, ᐃᖃᓗᖕᓂ.

ᒪᑕᓕᓐ ᐊᒥᓱᒻᒪᕆᖕᓂᒃ ᐊᑭᓕᖅᑐᖅᑕᐅᓇᓂ ᐱᓕᕆᓯᒪᕗᖅ ᐊᒻᒪᓗ ᐊᐅᓚᑦᑎᔨᐅᖃᑦᑕᖅᓯᒪᓪᓗᓂ ᐃᓄᖕᓂ ᓄᓇᖃᖃᖅᑐᓂᓗ, ᓲᕐᓗ ᐊᖓᔪᖃᕆᔭᐅᓯᒪᔪᖅ ᑐᖓᓱᒡᕕᖓᑦ ᐃᓄᐃᑦ ᐃᑲᔪᖅᑲᑎᒌᒡᕕᖕᒥ, ᑎᑎᕋᖅᑎᐅᓚᐅᖅᑐᖅ−ᑮᓇᐅᔭᓕᕆᔨᐅᓪᓗᓂᓗ ᐃᓄᖕᓂ ᑮᓇᐅᔭᓕᐅᖅᑎᐅᓇᓱᐊᖏᑦᑐᓂ ᐃᒡᓗᓕᕆᔨᖏᓐᓂ, ᑲᑎᒪᔨᐅᖄᖅᑐᓂ ᑲᑎᒪᔨᐅᓚᐅᖅᑐᓂ ᐅᐊᐸᓄ ᓄᓇᖃᖃᖅᑐᑦ ᐋᓐᓂᐊᖅᑐᓕᕆᔨᒃᑯᖏᓐᓂ, ᐃᓚᒋᔭᐅᓚᐅᖅᑐᖅ ᓯᕗᓪᓕᕐᒥ ᑲᑎᒪᔨᓂ ᐋᑐᕚᒥ ᐃᓕᓐᓂᐊᓕᓵᖅᑐᓂᒃ ᐃᓄᐃᑦ ᓱᕈᓰᑦ, ᐃᓄᖕᓂ ᑭᒡᒐᖅᑐᐃᔨᐅᓯᒪᔪᖅ ᑲᒡᒋᑖᒃ ᒥᑲᒻᑯᓐᓂ (Kagita Mikam), ᓄᓇᖃᖅᑲᖅᑐᓄᑦ ᐃᖃᓇᐃᔭᒃᓴᖅᓯᐅᕐᕕᖕᒧᑦ ᑲᑎᒪᔩᑦ, ᑐᑭᓕᐅᖅᑎᐅᓯᒪᔪᖅ ᐃᖃᓗᖕᓂ ᐱᖅᑯᓯᑐᖃᖅᑎᒍᑦ ᐃᖃᖅᑐᐃᕕᓕᕆᓂᕐᒧᑦ, ᓄᓇᓕᖕᓂ ᑭᒡᒐᖅᑐᐃᔨᐅᔪᖅ ᐃᖃᓗᐃᑦ ᓄᓇᓕᖓᓐᓂ ᓴᖑᓐᓂᐊᕐᕕᐅᓂᕐᒧᑦ ᑲᑎᒪᔨᓄᑦ, ᐊᒻᒪᓗ ᒫᓐᓇᐅᔪᖅ ᑎᑎᕋᖅᑎᐅᓪᓗ−ᑮᓇᐅᔭᓕᕆᔨᐅᓪᓗᓂᓗ ᒪᓕᒐᕐᓂ ᑐᑭᓯᓂᐊᕐᕕᒃᑯᑦ ᑲᑎᒪᔨᖏᓐᓂ ᐊᒻᒪᓗ ᐃᒃᓯᕙᐅᑕᐅᑲᐃᓐᓇᖅᓱᓂ ᒪᓕᒐᓕᕆᓂᕐᒧᑦ ᐱᔨᑦᑎᕋᐅᑎᓄᑦ ᑲᑎᒪᔨᓂ.

ᒪᑕᓕᓐ ᐃᓕᓐᓂᐊᖅᓯᒪᓂᖓ, ᐱᓕᕆᔨᑦᑎᐊᕙᐅᓂᖓ, ᐊᒻᒪᓗ ᐃᑲᔪᖅᑎᐅᖃᑦᑕᕐᓂᖓ 20 ᐊᕐᕋᒍᓂᒃ ᑕᒪᐃᓐᓂ ᓄᓇᓕᖕᓂ, ᓄᓇᕗᒻᒥ, ᑲᓇᑕᓕᒫᒥᓗ ᓇᓗᓇᖏᓚᖅ ᐱᓂᐊᕐᓂᖃᕐᓂᖓᓂᒃ ᐃᓚᐅᔪᒪᓂᖅ ᐱᕙᓪᓕᐊᓂᕐᒧᑦ ᐊᒻᒪᓗ ᐊᑐᐃᓐᓇᐅᓂᖏᓐᓄᑦ ᐃᓅᖃᑎᒌᒃᑐᓄᑦ ᐃᑲᔫᑏᑦ ᐊᑐᒐᒃᓴᐃᑦ ᐱᔨᑦᑎᕋᐅᑏᓪᓗ, ᐃᓚᖃᕐᓗᑎᒃ ᐱᒻᒪᕆᐅᑎᑕᐅᔪᓂᒃ, ᓯᕗᓪᓕᐅᑎᑕᐅᔪᓂᒃ, ᐊᒻᒪᓗ ᐱᔭᕆᐊᖃᕐᓂᖏᓐᓂ ᐃᓄᐃᑦ.

ᐹᓪ ᑯᕋᐅᓕ

ᐸᓪ ᑯᕋᐅᓕ ᐱᓕᕆᓯᒪᓕᖅᐳᖅ ᓴᐳᓐᓂᐊᖅᑕᐅᔪᓂᒃ ᐱᕙᓪᓕᐊᔪᓕᕆᓂᕐᒥᒃ ᒪᓕᒐᓕᕆᓂᕐᒥᒃ ᐊᒻᒪᓗ ᐊᑐᐊᒐᓕᕆᓂᕐᒥᒃ ᑕᐃᒪᖓᑦ ᐱᒋᐊᓕᓵᓚᐅᖅᓯᒪᔪᓂᒃ 1990-ᒥ. ᓄᓇᖓᓂᒃ ᑲᔾᔭᕈᓱᖕᓂᕐᒧᑦ, ᑯᕋᐃᓕ ᓅᓚᐅᖅᓯᒪᔪᖅ ᐃᖃᓗᖕᓄᑦ, 1995-ᖑᑎᓪᓗᒍ. ᑕᐃᒪᖓᑦ ᐱᕈᖅᑎᑦᑎᓯᒪᕗᖅ ᒪᓕᒐᓕᕆᕕᖕᒥᒃ ᓄᓇᕐᔪᐊᓕᒫᒧᑦ ᑎᑭᖓᔪᒥᒃ. ᑯᕋᐅᓕ ᑭᒡᒐᖅᑐᐃᖃᑦᑕᖅᓯᒪᔪᖅ ᐊᒥᓱᒐᓴᖕᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒥᓱᓂᒃ ᐊᔾᔨᒌᖏᑦᑐᑎᓂᒃ ᐱᔾᔪᑎᖃᖅᑐᓂᒃ ᐃᓅᓯᓕᕆᓂᒃᒥᒃ, ᐃᓕᖅᑯᓯᓕᕆᓂᕐᒥᒃ, ᑮᓇᐅᔭᓕᐅᕐᕈᑎᒃᓴᓂᒃ, ᐃᓄᓕᒫᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐊᕙᑎᓕᕆᓂᕐᒧᑦ ᐃᓱᒪᓘᑖᐅᔪᓂᒃ. ᒫᓐᓇᓵᖅ, ᑯᕋᐃᓕ ᐱᓕᕆᓚᐅᖅᑐᖅ ᑭᒡᒐᖅᑐᐃᓗᓂ 62−ᓂᒃ ᐃᓄᖕᓂᒃ ᐊᖑᓇᓱᒃᑎᓂᒃ ᐃᓐᓇᑐᖃᕐᓂᒡᓗ ᐊᒻᒪᓗ ᓯᓚ ᐅᐊ−ᑯᓘᑎᔭᐃᒥᒃ, ᓂᕈᐊᒐᒃᓴᓐᖑᖅᑎᑕᐅᓚᐅᖅᓯᒪᔪᒥᒃ ᓯᓚᕐᔪᐊᕐᒥ ᐃᓅᓪᓗᓂ ᐊᔭᐅᖅᑎᐅᔪᖅ ᐅᔾᔨᕆᔭᐅᖁᓪᓗᓂᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖏᑦ ᐊᒃᑐᖅᓯᓯᒪᓂᖏᓐᓂᒃ ᐃᓄᖕᓂᒃ, ᐊᔭᐅᕈᑎᖃᖅᓱᓂ ᐊᒥᐊᓕᑲᒥᐅᓂᒃ ᐊᓯᖏᓐᓂᓗ ᑲᒥᓴᓐᑯᖏᓐᓂᒃ ᐃᓄᓕᒫᑦ ᐱᔪᓐᓇᐅᑎᖏᓐᓂᒃ ᐊᑭᕋᖅᑐᖅᑕᐅᓪᓗᑎᒃ ᐊᒥᐊᓕᑲᒥᐅᑦ ᓄᓇᐃᑦ. ᑯᕋᐅᓕ ᒪᓕᒐᓕᕆᔨᒋᔭᐅᕗᖅ ᕿᑭᖅᑕᓂ ᓱᓕᔪᓂᒃ ᑭᒡᓕᓯᓂᐊᖅᑎᒃᑯᓐᓄᑦ.